Azərbaycan futbolunda yeni mövsümə hazırlıq davam etsə də, Əvəzedicilər Liqasının nə vaxt başlayacağı hələ də rəsmən açıqlanmayıb. Premyer Liqa, Birinci Liqa və İkinci Liqanın start tarixləri müəyyənləşsə də, əvəzedici komandaların yarışının təqvimi və formatı ilə bağlı müzakirələr davam edir.
Məlumata görə, gecikmənin əsas səbəbi turnirin reqlamentində planlaşdırılan dəyişikliklərdir. Yeni qaydaların tətbiqi ilə bağlı yekun qərar qəbul edilmədiyi üçün liqanın başlanğıc tarixi də hələ açıqlanmır.
Reqlamentdə hansı yeniliklər gözlənilir?
Müzakirə olunan dəyişikliklər arasında yeni iştirak limiti və yaş məhdudiyyətlərinin tətbiqi də yer alır. Gözləntilərə görə, yeniliklər əsasən 2006–2008-ci il təvəllüdlü futbolçuları əhatə edəcək. Bu addımın Azərbaycanda keçiriləcək U-20 dünya çempionatı ərəfəsində milli komandanın məşqçilər korpusuna daha geniş oyunçu seçimi yaratmaq məqsədi daşıdığı bildirilir.
Əvəzedicilər Liqasının başlanma tarixi ilə bağlı Peşəkar Futbol Liqasından bildirilib ki, hazırda yarış üçün ən optimal model üzərində iş aparılır.
Qurumun açıqlamasında deyilir: “Əvəzedicilər Liqası ilə bağlı hazırda mümkün ən yaxşı variantların müzakirəsi aparılır. Bununla bağlı yaxın günlərdə daha ətraflı məlumat veriləcək”.
Xatırladaq ki, ötən mövsüm Əvəzedicilər Liqasının qalibi “Sabah-2” komandası olub. Yeni mövsümün formatı və təqvimi ilə bağlı yekun qərarın yaxın günlərdə açıqlanacağı gözlənilir.
