NHL-də yay transfer dövrünün ən səs-küylü hadisələrindən biri rəsmiləşib. “Anaheim Ducks” klubu mərkəz hücumçusu Leo Karlssona təqdim olunan beş illik müqavilə təklifini eyniləşdirərək isveçli hokkeyçini komandada saxlayıb. Beləliklə, cəmi 21 yaşı olan oyunçu dünyanın ən güclü hokkey liqasında illik qazancı ən yüksək olan idmançı statusunu qazanıb.
Müqavilənin ümumi dəyəri 90 milyon ABŞ dollarıdır. Bu isə Karlssonun hər mövsüm orta hesabla 18 milyon dollar qazanacağı anlamına gəlir. Yeni razılaşma nəticəsində o, illik maaşa görə NHL rekordunu yeniləyərək Kirill Kaprizovun 17 milyon dollarlıq və Leon Drayzaytlın 14 milyon dollarlıq göstəricilərini geridə qoyub. Müqavilənin şərtlərinə əsasən, hücumçu ən azı bir il ərzində başqa kluba transfer edilə bilməyəcək.
Gənc isveçli parlaq çıxışı ilə diqqət çəkib
Leo Karlsson 2023-cü il NHL Draftında ikinci seçim kimi məhz “Anaheim Ducks” tərəfindən heyətə cəlb olunmuşdu. O, qısa müddətdə komandanın əsas simalarından birinə çevrilərək son mövsümdə 70 oyunda 29 qol və 38 məhsuldar ötürmə ilə 67 xal toplayıb. Karyerası ərzində isə müntəzəm mövsümdə keçirdiyi 201 qarşılaşmada 61 qol, 80 assist və ümumilikdə 141 xala imza atıb. Pley-off mərhələsində də 12 oyunda 11 xal qazanaraq komandasının uğurlarında mühüm rol oynayıb.
Yeni müqavilə həm Karlssonun gələcəyinə olan etimadın, həm də “Anaheim Ducks” rəhbərliyinin gənc ulduzu uzunmüddətli layihənin əsas fiquru kimi gördüyünün göstəricisi hesab olunur. Klub rəhbərliyi isveçli hokkeyçinin komandanın gələcək uğurlarında əsas rol oynayacağına inandığını vurğulayıb.
