Azərbaycan Şahmat Federasiyası sentyabr ayında Özbəkistanın Səmərqənd şəhərində keçiriləcək 46-cı Ümumdünya Şahmat Olimpiadasında mübarizə aparacaq kişi və qadın milli komandalarının heyətini açıqlayıb. Dünyanın ən nüfuzlu komanda şahmat yarışlarından sayılan Olimpiada 15-27 sentyabr tarixlərində təşkil olunacaq.
Millilər hansı heyətlə mübarizə aparacaq?
Kişilərdən ibarət Azərbaycan yığmasına aşağıdakı şahmatçılar dəvət alıblar:
- Şəhriyar Məmmədyarov
- Aydın Süleymanlı
- Məhəmməd Muradlı
- Rauf Məmmədov
- Eltac Səfərli
Komandanın kapitanı qrossmeyster Teymur Rəcəbov olacaq.
Qadınlardan ibarət millidə isə ölkəni bu şahmatçılar təmsil edəcəklər:
- Ülviyyə Fətəliyeva
- Gövhər Beydullayeva
- Xanım Balacayeva
- Günay Məmmədzadə
- Gülnar Məmmədova
Qadın yığmasının kapitanı Nicat Abasov olacaq, təcrübəli qrossmeyster Qədir Hüseynov isə məşqçi kimi komandaya dəstək verəcək.
Hər iki milli komanda yarışdan əvvəl təlim-məşq toplanışına qatılacaq. Şahmatçıların lövhələr üzrə düzülüşü isə turnirə yaxın tarixdə açıqlanacaq.
Azərbaycan yığmaları son illərdə Ümumdünya Şahmat Olimpiadalarında uğurlu çıxışları ilə seçiliblər. Federasiya builki yarışda da həm kişi, həm də qadın komandalarının yüksək nəticə uğrunda mübarizə aparacağına ümid edir.
