Bakıda təşkil olunacaq güləş üzrə U-17 dünya çempionatını tribunadan izləmək istəyən azarkeşlər artıq biletləri əldə edə bilərlər. İyulun 27-dən avqustun 2-dək Milli Gimnastika Arenasında keçiriləcək mötəbər yarış üçün bilet satışı rəsmi olaraq başlayıb. Biletləri iticket.az platforması vasitəsilə onlayn, həmçinin iTicket-in satış məntəqələrindən almaq mümkündür. Qiymətlər isə 2 və 5 manat arasında dəyişir.
Dünya çempionatında yunan-Roma güləşi, qadın güləşi və sərbəst güləş üzrə dünyanın ən istedadlı 17 yaşadək idmançıları mübarizə aparacaqlar. İlkin qeydiyyat siyahısına əsasən, turnirdə yüzlərlə gənc pəhləvanın iştirakı gözlənilir və Bakı bir həftə ərzində yeniyetmə güləşçilərin dünya mərkəzinə çevriləcək.
Çempionatın proqramına əsasən, yarışlar hər gün iki hissədən ibarət olacaq:
Gündüz sessiyası (10:30–14:30)
- İlkin qarşılaşmalar
- Yarımfinala vəsiqə uğrunda görüşlər
Axşam sessiyası (17:00–20:00)
- Yarımfinal qarşılaşmaları
- Medal uğrunda final görüşləri
- Mükafatlandırma mərasimləri
Bir bilet gün ərzində keçiriləcək hər iki sessiyanı izləməyə imkan verəcək.
Azarkeşlər üçün fan zona da fəaliyyət göstərəcək
Çempionat günlərində Milli Gimnastika Arenasında xüsusi fan zona yaradılacaq. Burada azarkeşlər müxtəlif əyləncə proqramlarında iştirak edə, interaktiv oyunlara qoşula və tanınmış güləşçilərlə imza görüşlərində iştirak edə biləcəklər. Bu səbəbdən təşkilatçılar yarışın yalnız idman deyil, həm də ailələr və güləş həvəskarları üçün əyləncəli festival ab-havasında keçəcəyini bildirirlər.
Hazırda dünyanın müxtəlif ölkələrindən 650-dən çox idmançının qeydiyyatdan keçdiyi, ümumilikdə isə 1000-dən artıq qonağın Bakıya gəlməsinin gözlənildiyi açıqlanıb.
