Azərbaycanın çimərlik güləşçisi Camal Feyziyev Bakıda keçirilən Dünya Seriyasının IV mərhələsində +90 kq çəki dərəcəsində qızıl medal qazanmasından danışıb. 26 yaşlı idmançı doğma azarkeşlər qarşısında güclü rəqibi məğlub etməyin onun üçün xüsusi əhəmiyyət daşıdığını bildirib.
Feyziyev finalda ukraynalı Vaja Dayauriyə 1:0 hesabı ilə qalib gəlib. Bundan əvvəl yarımfinalda gürcü Tedore Ebanoidzeni cəmi 55 saniyəyə 3:0 hesabı ilə məğlub edib.
Azərbaycan təmsilçisi əvvəllər yunan-Roma güləşi ilə məşğul olduğunu, eyni zamanda cüdo və sumoda da özünü sınadığını qeyd edib.
“Gücümü güləş növlərində, eləcə də cüdo və sumoda sınamışam. Sumo üzrə 10 qat Avropa çempionuyam. Çimərlik güləşi sumoya çox bənzəyir. Elə bu yarışın finalında qarşılaşdığım ukraynalı Vaja Dayauri ilə daha öncə sumoda 5 dəfə üz-üzə gəlmişəm. Bunların üçündə mən qalib gəlmişəm. Rəqib sumo üzrə dünya çempionudur. Sevindirici haldır ki, doğma məkanda və azarkeşlərimiz önündə güclü rəqibə qalib gələrək çempion oldum”.
Feyziyev dünya çempionluğunu hədəfləyir
Camal Feyziyev uğurunda Azərbaycan Güləş Federasiyasının dəstəyinin və iki aylıq hazırlıq prosesinin böyük rol oynadığını vurğulayıb.
“Federasiya rəhbərliyinin mənə inamı və böyük dəstəyi var idi. Hərbi xidməti apreldə bitirdiyim üçün Dünya Seriyasının ilk yarışlarında iştirak edə bilmədim. Baş məşqçimiz Oyan Nəzərianinin rəhbərliyi altında keçdiyimiz 2 aylıq təlim-məşq toplanışı sayəsində bu uğura imza ata bildim. Növbəti hədəfim Yunanıstanda keçiriləcək Dünya Seriyasının final mərhələsində qalib gələrək dünya çempionu olmaqdır”.
Dünya Seriyasının 2026-cı il mövsümünün sonuncu mərhələsi 26–27 sentyabrda Yunanıstanın Katerini şəhərində keçiriləcək.
Bakıda isə Azərbaycan kişilər arasında dörd çəki dərəcəsindən üçündə çempion olub. Vüsal Əliyev 80 kq, Əşrəf Aşırov 90 kq, Camal Feyziyev isə +90 kq-da qızıl medal qazanıb. Sahib Dadaşov və Nərgiz Səmədova gümüş, Cavid Niftəlizadə və Ramiz Həsənov isə bürünc medala sahib çıxıblar. Beləliklə, Azərbaycan yığması mərhələni ümumilikdə 7 medalla başa vurub.
Kişilərdən ibarət Azərbaycan millisi 84 xal toplayaraq komanda hesabında birinci yeri tutub. Bakı 28–29 avqustda Dünya Seriyasının mərhələsinə tarixində ilk dəfə ev sahibliyi edib.
