Azərbaycanın tanınmış karateçisi, 68 kq-dan yuxarı çəki dərəcəsində Avropa Çempionatının və İslam Həmrəyliyi Oyunlarının gümüş mükafatçısı Fəridə Əliyeva idman karyerasını bitirmək məcburiyyətində qaldı. Sport-az.com xəbər verir ki, buna səbəb Azərbaycan Karate Federasiyası ilə yaranan mübahisə olub. Federasiya idmançıya maaş ödənişini dayandırıb.
Fəridə Əliyeva, 2023-cü ildə Avropa Çempionatının finalına çıxan ilk və yeganə Azərbaycanlı qadın karateçi kimi tarixə düşmüşdü. Lakin federasiya bu uğurdan 5 ay əvvəl, son illərdə nəticələrin olmamasını əsas gətirərək, ona maaş ödənişini dayandırmışdı. “Mənə dedilər ki, federasiyanın pulu yoxdur, mən də idmanı tərk etdim,” – deyə Əliyeva bildirib.
O, qaydalara görə növbəti analoji turnirə qədər maaş almalı olduğunu qeyd edib. Federasiya vədinə baxmayaraq, Azərbaycan çempionu olduqdan sonra da ödənişlər bərpa olunmayıb. “Mənə dedilər ki, federasiyada problemlər var. Amma başqalarının maaş aldığını öyrəndim,” – deyə karateçi əlavə edib.
Fəridə Əliyeva həmçinin federasiyanın yarışlarda aldığı burun zədəsi ilə bağlı əməliyyat xərcini ödəmədiyini də bildirib. “İllərlə Azərbaycan bayrağını yüksəldirsən, gücünü və sağlamlığını sərf edirsən, amma səninlə bir problem yarananda səndən üz döndərirlər. Belə bir mühitdə qalmağın mənası yoxdur,” – deyə o, təəssüf hissi ilə qeyd edib.
27 yaşlı idmançı artıq şəxsi həyatını qurmağa vaxtın çatdığını vurğulayıb. Hazırda o, Azərbaycan İqtisadiyyat Nazirliyi yanında Əmlak Məsələləri Dövlət Xidmətində çalışır. Əliyeva problemin yalnız onunla məhdudlaşmadığını, digər idmançılar arasında da belə hallar olduğunu bildirib: “Mənim problemim konkret federasiya rəhbəri Ülvi Quliyevlə bağlı deyil. Mən onun zalında böyümüşəm. Sadəcə olaraq, ümumi vəziyyət elədir ki, bu məsələlərə maraq azalıb. Bu gün kiminlə danışsan, hamı problemlərdən şikayət edir. Amma məşqçilərimdən həmişə razı olmuşam, onların üzərimdə böyük əməyi var. Təəssüf ki, ayrılmalı oldum,” – deyə Fəridə Əliyeva sözlərini yekunlaşdırıb.
