Nyukasl İngiltərə Liqa Kubokunun finalında Liverpulu 2:1 hesabı ilə məğlub edərək 1969-cu ildən bəri ilk böyük titulunu qazandı.
Matçın nəticələri:
Liverpul – Nyukasl – 1:2
Qollar: Kyeza (90+4) – Börn (45), İsak (52)
Nyukasl 2023-cü ildə də finala çıxmış, lakin Mançester Yunaytedə uduzmuşdu. Bu dəfə isə komanda finala daha hazırlıqlı gəldi. Liverpul həftə içi 120 dəqiqəlik gərgin oyun keçirərək PSJ-yə məğlub oldu və Çempionlar Liqasında mübarizəni dayandırdı. Bununla yanaşı, Trent Aleksander-Arnoldun zədələnməsi komandaya əlavə problem yaratdı.
Liverpul ilk hissədə çox zəif oynadı – 45 dəqiqə ərzində qapıya cəmi bir zərbə endirdi və o da dəqiq olmadı. Nyukasl isə üstünlüyünü addım-addım quraraq, hissənin sonlarında Trippierin künc zərbəsindən ötürməsindən sonra Börnün baş zərbəsi ilə hesabı açdı.
İkinci hissədə Liverpul toparlanmağa çalışsa da, İsak 52-ci dəqiqədə fərqi artırdı. İlk zərbəsi ofsayd səbəbindən sayılmasa da, Murfinin ötürməsindən sonra 23-cü qolunu vuraraq Nyukaslı 2:0 önə keçirdi. Liverpul qələbə üçün lazım olan intensivliyi tapa bilmədi. Kyeza kompensasiya vaxtında bir qol vurdu, lakin bu, yalnız hesab fərqini azaltmağa kifayət etdi.
Nyukasl nəhayət ki, 56 illik titulsuz dövrünü başa vuraraq tarixi qələbə qazandı. Liverpul isə bir ay ərzində üçüncü titul şansını əldən verərək İngiltərə Premyer Liqasında mövqeyini qorumaq üçün mübarizəsini davam etdirməlidir.
