Azərbaycan Regional Liqasının V turu çərçivəsində keçirilən “Şirvan OİK” – “Ergüneş” (Füzuli) oyunu çempionat tarixində nadir rast gəlinən hesabla yadda qalıb.
Sport-az xəbər verir ki, D qrupunun bu qarşılaşmasında Şirvan təmsilçisi rəqib qapısından tam 18 cavabsız qol keçirib. Oyun boyunca meydan sahibləri adeta qollar yağdırıb – hər 5 dəqiqədən bir qol vurulub.
Görüşdə xüsusilə fərqlənən futbolçu isə Cavid Nəcəfzadə olub – hücumçu 13 dəfə fərqlənərək şəxsi və komanda rekorduna imza atıb. Bu hesab cari mövsümdə qeydə alınan ən böyük qələbədir və Region Liqasında yeni rekord kimi tarixə düşüb.
Hazırda “Şirvan OİK” 4 oyundan sonra 9 xalla qrupda 2-ci pillədə qərarlaşıb. Füzuli təmsilçisi “Ergüneş” isə cəmi 3 xalla 6-cı yerdədir.
