Madrid “Real” klubunun braziliyalı hücumçusu Vinisiyus Junior karyerası üçün ciddi təhlükə ilə üz-üzə qala bilər. Tanınmış italyan jurnalist Canluka Di Marziona istinadən yayılan xəbərlərə görə, Vinisiyus iki ilədək futboldan kənarlaşdırıla bilər.
Məsələ burasındadır ki, 7 aprel tarixində Braziliya şirkəti Tiberis Holding do Brasil FIFA-nın Etika Komitəsinin İstintaq Palatasına şikayət ünvanlayıb. Şirkət iddia edir ki, Vinisiyus atası və meneceri tərəfindən idarə olunan ALL Agenciamento Esportivo adlı agentlik vasitəsilə bir neçə peşəkar futbol klubunun satın alınmasında iştirak edir. Bu isə, qaydalara görə, ciddi maraq toqquşması hesab oluna bilər.
Tiberis şirkəti bu hərəkətin FIFA-nın Etik Məcəlləsinin 20-ci maddəsini, eləcə də İspaniya Futbol Federasiyasının İdman Ədalət Məcəlləsinin 22-ci maddəsini pozduğunu bildirir. Hər iki normativ akt hazırda aktiv peşəkar futbolçuların birbaşa və ya dolayı yollarla klub sahibi olmasına qəti şəkildə qadağa qoyur – hətta əgər bu münaqişə potensial səviyyədə olsa belə.
Əgər bu iddialar təsdiqini taparsa, Vinisiyus aşağıdakı iki cəzadan biri ilə qarşılaşa bilər:
- İki il futboldan uzaqlaşdırılma (maksimal cəza);
- Maddi cərimə və klub səhmlərini satmaq öhdəliyi.
Vinisiyus Juniorun nümayəndələri hələlik məsələyə rəsmi münasibət bildirməyiblər.
