Madridin “Real” klubu əfsanəvi futbolçu Raul Qonsalesin gənclər komandasındakı məşqçilik fəaliyyətinə son qoyduğunu rəsmən açıqlayıb. Bu barədə Sport-az.com məlumat yayıb.
Raul “Real Madrid Castilla” ilə vidalaşır
Klubun mətbuat xidmətinin yaydığı rəsmi bəyanatda Raulun gələcək planları açıqlanmasa da, onun “Real” üçün gördüyü işlərə yüksək qiymət verilib:
“Klub tarixinin və dünya futbolunun ən böyük əfsanələrindən birinin gənclər komandamıza baş məşqçi kimi rəhbərlik etməsi “Real Madrid” üçün böyük qürur mənbəyi idi. Raul klubun dəyərlərini ən yaxşı təmsil edən simalardan biridir – o, bu dəyərləri gənc futbolçulara ötürməyi bacardı. Raul bütün “Real Madrid” azarkeşlərinin qəlbində daima yer alacaq. Klub isə onun əbədi evidir. Ona və ailəsinə gələcək həyat mərhələsində ən xoş arzularımızı çatdırırıq.”
Raulun növbəti addımı hələlik naməlumdur
İspaniyanın canlı əfsanəsi olan Raul son illər “Real Madrid Castilla”nın baş məşqçisi kimi fəaliyyət göstərirdi və bir çox gənc istedadın əsas komandaya inteqrasiyasında mühüm rol oynamışdı. Onun yeni məşqçilik macərasını harada davam etdirəcəyi isə hələlik açıq qalıb.
