4 iyul tarixində Nigeriya futbolu böyük itki yaşadı — ölkə futbolunun canlı əfsanəsi, iki dünya çempionatında iştirak etmiş və qapıçı kimi qol vurmuş nadir oyunçulardan biri olan Piter Rufay dünyasını dəyişdi. Məlumatı Radio Nigeria Lagos yayıb.
Piter Rufayın ölüm səbəbi uzun müddətli xəstəlik olub. Futbol ictimaiyyəti onu “Dodomayana” ləqəbi ilə tanıyırdı — bu, onun meydandakı xarizması və qəhrəmanlıq simvoluna çevrilmiş qurtarışları ilə bağlı idi.
Milli komandada Rufay 65 oyuna çıxıb. O, 1994 və 1998-ci illərdə Nigeriyanı dünya çempionatlarında təmsil edib. Ən böyük uğurlarından biri isə 1994-cü ildə Afrika Millətlər Kubokunun qalibi olmasıdır.
Rufay təkcə qapını qorumaqda deyil, həm də unikal bir hadisə ilə tarixə düşüb. 1993-cü ildə Afrika Millətlər Kubokuna seçmə mərhələdə Efiopiyaya qarşı oyunda penalti zərbəsini dəqiq yerinə yetirərək qol vurmuşdu. O qarşılaşma Nigeriyanın 6:0 hesablı qələbəsi ilə başa çatmışdı.
Klublar və karyeradan sonrakı həyat
Peşəkar karyerası ərzində Rufay Avropanın müxtəlif komandalarında çıxış edib:
- Lokeren (Belçika)
- Beveren (Belçika)
- Go Ahead Eagles (Niderland)
- Farense, Gil Vicente (Portuqaliya)
- Hércules, Deportivo (İspaniya)
Futbolçu karyerasını başa vurduqdan sonra İspaniyada məskunlaşan Rufay burada özəl qapıçılar məktəbi qurmuşdu və yeni nəsil futbolçulara təlim verirdi.
Qeyd edək ki, bir neçə gün öncə Portuqaliya millisinin və “Liverpul” klubunun hücumçusu Diogu Jota və onun qardaşı Andre Silva avtomobil qəzasında həlak olub. Onların Lamborghini markalı avtomobili İspaniyada qəza nəticəsində yanmışdı.
