Qadın voleybolçulardan ibarət Azərbaycan millisi Bakıda keçirilən Avropa çempionatının C qrupunda son oyununa çıxacaq. Faiq Qarayevin rəhbərlik etdiyi yığma qrup mərhələsini Niderlandla qarşılaşma ilə tamamlayacaq.
Görüş Milli Gimnastika Arenasında keçiriləcək və saat 18:30-da başlayacaq. Bu qarşılaşma qrupda ikinci pillənin sahibini müəyyənləşdirəcək. Hər iki komanda artıq 1/8 finala vəsiqəni təmin edib.
Günün digər matçında saat 15:30-da Rumıniya və İspaniya üz-üzə gələcək. Bununla da Bakıda təşkil olunan C qrupunun oyunlarına yekun vurulacaq.
Azərbaycan və Niderland ikinci yer uğrunda mübarizə aparacaq
Belçika beş oyundan beş qələbə qazanaraq 13 xalla C qrupunun liderliyini və birinci yeri təmin edib. Niderland 9 xalla ikinci, Azərbaycan isə 8 xalla üçüncü pillədədir. Portuqaliya 5 xalla dördüncü yeri tutaraq tarixində ilk dəfə Avropa çempionatının 1/8 finalına yüksəlib. Rumıniyanın 3, İspaniyanın isə 1 xalı var.
Niderland əvvəlki turda Belçika ilə gərgin beşsetlik qarşılaşmada 2:3 hesabı ilə məğlub olaraq turnirdə ilk yenilgisini alıb. Azərbaycan üzərində qələbə Niderlanda ikinci pilləni qorumağa imkan verəcək, millimiz isə rəqibini qabaqlamaq üçün meydançaya çıxacaq.
Millimiz üç qələbə ilə pley-offa vəsiqə qazanıb
Azərbaycan yığması Avropa çempionatına uğurlu başlayaraq ilk üç qarşılaşmasının hamısında qalib gəlib. Faiq Qarayevin komandası Portuqaliyanı 3:1, İspaniyanı 3:0, Rumıniyanı isə beş set davam edən görüşdə 3:2 hesabı ilə məğlub edib.
Millimiz ilk məğlubiyyətini Belçika ilə qarşılaşmada yaşayıb – 0:3. Buna baxmayaraq, Azərbaycan Rumıniya üzərində qazandığı üçüncü qələbədən sonra vaxtından əvvəl 1/8 finala vəsiqəsini rəsmiləşdirib.
Niderlandla son görüşün nəticəsi Azərbaycan millisinin C qrupunu hansı pillədə tamamlayacağını və pley-off mərhələsindəki mövqeyini müəyyənləşdirəcək.
