Albaniyanın paytaxtı Tiranada keçirilən Avropa çempionatı Azərbaycan güləşi üçün növbəti böyük uğurla yadda qalıb. Yunan-Roma güləşi üzrə millinin qitə çempionluğundan sonra sərbəst güləş yığmamız da turniri zirvədə başa vuraraq ölkəmizə növbəti tarixi nəticəni qazandırıb.
Komandamız ümumilikdə 3 qızıl, 2 gümüş və 1 bürünc medal əldə edərək 152 xalla komanda hesabında birinci olub. Bu nəticə ilə Azərbaycan sərbəst güləş üzrə tarixində altıncı dəfə Avropa çempionu adını qazanıb. Millimiz ən yaxın izləyicisi olan Gürcüstanı 58 xal qabaqlayıb, Ermənistan isə 73 xalla üçüncü yeri tutub.
Medallar və rekord nəticə
Tirana turniri Azərbaycan üçün son illərin ən uğurlu çıxışlarından biri kimi qiymətləndirilir. Medalların əyarına görə bu nəticə son 17 ilin ən yaxşı göstəricisi hesab olunur. Sonuncu dəfə bu qədər yüksək nəticə 2009-cu ildə qeydə alınmışdı.
Qızıl medal qazanan güləşçilər:
- İslam Bazarqanov (57 kq)
- Əli Tsokayevi (92 kq)
- Giorgi Meşvildişvili (125 kq)
Gümüş mükafatçılar:
- Turan Bayramov (74 kq)
- Arseniy Djioyev (86 kq)
Bürünc medal:
- Cəbrayıl Hacıyev (79 kq)
Bu qələbə Azərbaycan güləşinin son illərdəki sabit inkişafını bir daha nümayiş etdirir. Qeyd edək ki, millimiz bundan əvvəl 2009, 2017, 2022, 2023 və 2025-ci illərdə də Avropanın ən güclü komandası olmuşdu.
Tiranadakı nəticə ilə Azərbaycan yığması həm sərbəst, həm də yunan-Roma güləşi üzrə komanda hesabında çempion olaraq növbəti dəfə “qızıl dubl”a imza atıb.
