Bakıda UEFA-nın “Hat-Trick” proqramı çərçivəsində təşkil olunan tələbələrarası futzal turniri başa çatıb. AFFA və Azərbaycan Texniki Universitetinin birgə keçirdiyi yarış Ümummilli Lider Heydər Əliyevin anadan olmasının 103-cü ildönümünə həsr olunub.
Turnirin həlledici görüşləri universitetin idman kompleksində yerləşən futzal meydançasında keçirilib. Yarış boyunca müxtəlif fakültələrin komandaları arasında gərgin və maraqlı mübarizə izlənilib.
Final matçı əlavə vaxtda həll olundu
Üçüncü yer uğrunda keçirilən qarşılaşmada Nəqliyyat və Logistika fakültəsinin komandası İTT fakültəsini 2:0 hesabı ilə məğlub edərək bürünc medallara sahib çıxıb.
Final görüşündə isə İqtisadiyyat fakültəsi ilə Maşınqayırma və Metallurgiya fakültəsinin komandaları üz-üzə gəlib. Əsas vaxtda qalib müəyyənləşmədiyi üçün oyun əlavə vaxta gedib. Həlledici dəqiqələrdə üstün oyun nümayiş etdirən Maşınqayırma və Metallurgiya fakültəsinin komandası rəqibini 2:0 hesabı ilə məğlub edərək çempion olub.
Turnirin yekun nəticələri:
- 1-ci yer – Maşınqayırma və Metallurgiya fakültəsi
- 2-ci yer – İqtisadiyyat fakültəsi
- 3-cü yer – Nəqliyyat və Logistika fakültəsi
Qaliblərə kubok və xüsusi mükafatlar təqdim edildi
Mükafatlandırma mərasimində tanınmış veteran futbolçu Vəli Qasımov, universitet nümayəndələri və digər rəsmi şəxslər iştirak ediblər. Qalib komandaya AFFA tərəfindən kubok təqdim olunub, ilk üç pillədə qərarlaşan kollektivlər isə medal və diplomlarla təltif ediliblər.
Bundan başqa, turnirdə fərqlənən oyunçular müxtəlif fərdi nominasiyalar üzrə xüsusi mükafatlara layiq görülüblər. Təşkilatçılar bildiriblər ki, tələbə idmanının inkişafı və gənclərin futzala marağının artırılması məqsədilə gələcəkdə də oxşar layihələrin davam etdirilməsi planlaşdırılır.
