Formula 1-də mühərriklərin gələcəyi ilə bağlı müzakirələr yenidən gündəmin əsas mövzularından birinə çevrilib. FIA prezidenti Məhəmməd Ben Sulayem yaxın illərdə çempionatın daha sadə və daha sərfəli texniki qaydalara keçməsinin tərəfdarı olduğunu bir daha təsdiqləyib. Onun fikrincə, V8 mühərriklərinin geri dönüşü artıq real perspektivdir və bu dəyişiklik 2030 və ya ən gec 2031-ci ildə baş verə bilər.
Hazırda Formula 1 2026-cı ildən qüvvəyə minəcək yeni mühərrik reqlamenti ərəfəsindədir. Lakin FIA rəhbərliyi hesab edir ki, uzunmüddətli perspektivdə həddindən artıq mürəkkəb və bahalı hibrid sistemlərdən uzaqlaşmaq lazımdır. Ben Sulayem ekoloji yanacaqdan istifadə edən, lakin daha yüngül və sadə texnologiyalara əsaslanan güc qurğularının tərəfdarıdır.
Le-Man həftəsonunda çıxış edən FIA prezidenti bildirib ki, V8 konsepsiyası artıq müəyyənləşdirilib:
“V8 mühərrikləri ilə bağlı istiqamət bəllidir. Hədəfimiz 2030-cu ildir, ən gec isə 2031-ci ildə bu keçidin baş tutmasını istəyirik. Hibrid sistem qalacaq, amma daha yüngül və sadə formada. Mən mürəkkəbliyin əleyhinəyəm”.
Ben Sulayemin sözlərinə görə, FIA altı mühərrik istehsalçısı ilə məsləhətləşmələr aparıb və onların əksəriyyəti daha sadə texniki həllərin tərəfdarıdır. O, həmçinin mühərrik xərclərinin ciddi şəkildə azaldılmasının vacibliyini vurğulayıb.
FIA ilə Formula 1 rəhbərliyi arasında münasibətlər
FIA prezidenti Formula One Management (FOM) ilə münasibətlərin əvvəlki illərlə müqayisədə daha sağlam səviyyədə olduğunu da qeyd edib.
“FIA çempionatın sahibi, FOM isə onun promouteridir. İlk dövrlərdə bu münasibətləri dəqiqləşdirmək lazım idi. İndi isə bir-birimizə hörmət edirik və əməkdaşlıq daha konstruktiv şəkildə davam edir”, – deyə Ben Sulayem bildirib.
Formula 1-də mühərriklərin gələcəyi ilə bağlı yekun qərar hələ qəbul edilməsə də, FIA rəhbərliyinin V8 mühərriklərinə qayıdış ideyasını açıq şəkildə dəstəkləməsi bu mövzunun yaxın illərdə də müzakirələrin mərkəzində qalacağını göstərir.
