2026-cı il dünya çempionatında heç-heçələrin sayı artmaqda davam edir. H qrupunda keçirilən ilk tur matçında Səudiyyə Ərəbistanı ilə Uruqvay 1:1 hesablı bərabərliyə razılaşdı. Bir neçə saat sonra G qrupunda İran və Yeni Zelandiya da eyni hesabla yox, daha məhsuldar 2:2 nəticəsi ilə meydandan ayrıldı.
H qrupunda tam bərabərlik
Mayamidə yerləşən “Hard Rock Stadium”da baş tutan qarşılaşmada hesabı Səudiyyə Ərəbistanı açdı. Əl-Əmri 41-ci dəqiqədə fərqlənərək komandasını önə keçirdi və Asiya təmsilçisi uzun müddət üstünlüyünü qorudu.
İkinci hissədə təşəbbüsü tamamilə ələ alan Uruqvay nəhayət 80-ci dəqiqədə istəyinə çatdı. Maksimiliano Arauxonun qolu hesabı bərabərləşdirdi və matçın taleyini müəyyənləşdirdi – 1:1.
Qarşılaşmanın əsas qəhrəmanlarından biri Səudiyyə Ərəbistanının qapıçısı Məhəmməd əl-Oveys oldu. O, matç ərzində çoxsaylı təhlükəli zərbələrin qarşısını alaraq komandasına vacib xal qazandırdı.
DÇ-2026. H qrupu, 1-ci tur
Səudiyyə Ərəbistanı – Uruqvay – 1:1
Qollar: Əl-Əmri, 41 – Arauxo, 80
Bu nəticədən sonra H qrupunda vəziyyət tamamilə bərabərləşib. Günün əvvəlində İspaniya ilə Kabo-Verde qolsuz heç-heçə etdiyindən qrupun bütün komandaları ilk turdan sonra 1 xala sahibdir.
Yeni Zelandiya sürprizə yaxın oldu
G qrupunda keçirilən İran – Yeni Zelandiya oyunu isə daha məhsuldar alındı. Görüşə sürətli başlayan okeaniya təmsilçisi 7-ci dəqiqədə Elayca Castın qolu ilə hesabı açdı.
İran Rzaeianın qolu ilə tarazlığı bərpa etsə də, ikinci hissənin əvvəlində Cast yenidən fərqlənərək dubl müəllifi oldu və komandasını yenidən önə çıxardı. Bununla belə, iranlılar təslim olmadılar və Möhəbbinin 64-cü dəqiqədə vurduğu qol yekun hesabı formalaşdırdı – 2:2.
Yeni Zelandiya millisinin kapitanı Kris Vud iki məhsuldar ötürmə ilə seçilərək komandasının bütün qollarında birbaşa iştirak etdi. Elayca Cast isə turnirdə dubl edən futbolçular siyahısına qoşuldu.
DÇ-2026. G qrupu, 1-ci tur
İran – Yeni Zelandiya – 2:2
Qollar: Rzaeian, 32, Möhəbbi, 64 – Cast, 7, 54
Bu nəticədən sonra G qrupunda da tam tarazlıq yaranıb. Daha əvvəl Belçika ilə Misir arasında keçirilən qarşılaşma da 1:1 hesabı ilə başa çatmışdı.
