2026-cı il dünya çempionatının 1/16 final mərhələsində daha üç maraqlı qarşılaşma baş tutub. İspaniya Avstriyanı böyük hesabla məğlub edib, Portuqaliya dramatik sonluqda Xorvatiyanı mübarizədən kənarlaşdırıb, İsveçrə isə Əlcəzair üzərində inamlı qələbə qazanaraq növbəti mərhələyə yüksəlib.
İspaniya – Avstriya: Oyarzabal dublla parladı
İspaniya millisi Kaliforniyanın İnqlvud şəhərində yerləşən SoFi Stadium arenasında Avstriya ilə üz-üzə gəlib və rəqibini 3:0 hesabı ilə məğlub edib.
Luis de la Fuentenin yetirmələri ilk dəqiqələrdən oyuna nəzarəti ələ alaraq üstün futbol nümayiş etdiriblər. Hesabı 36-cı dəqiqədə Mikel Oyarzabal açıb. Fasilədən sonra Pedro Porro fərqi artırıb, qarşılaşmanın sonlarında isə Oyarzabal dublunu rəsmiləşdirərək İspaniyanın inamlı qələbəsini tamamlayıb.
Bu nəticədən sonra “Furiya Roxa” 1/8 finalda Portuqaliya – Xorvatiya cütünün qalibi ilə qarşılaşmaq hüququ qazanıb.
2026 Dünya Çempionatı. 1/16 final, 2 iyul
İspaniya – Avstriya – 3:0
Qollar: Oyarzabal, 36, 89, Porro, 66.
Portuqaliya – Xorvatiya: Ronaldo və Ramuş son sözü dedi
Toronto şəhərində keçirilən qarşılaşmada Portuqaliya geridönüş edərək Xorvatiyanı 2:1 hesabı ilə məğlub edib.
Matçın ikinci hissəsinin əvvəlində İvan Perişiç hesabı açsa da, Portuqaliya cavab verməkdə gecikməyib. Kriştianu Ronaldunun oyundan vurduğu qol əvvəlcə ofsayd səbəbindən ləğv edilib. Lakin veteran hücumçu 68-ci dəqiqədə penalti zərbəsini dəqiq yerinə yetirərək hesabı bərabərləşdirib.
Oyunun əsas vaxtına əlavə olunmuş dəqiqələrdə meydana sonradan daxil olan Qonsalu Ramuş komandasına qələbə qazandıran qolu vurub. Xorvatiya uzatma dəqiqələrində yenidən fərqlənsə də, bu dəfə də qol ofsayda görə qeydə alınmayıb.
Portuqaliya 1/8 finalda İspaniya ilə qarşılaşacaq.
2026 Dünya Çempionatı. Pley-off
1/16 final, 3 iyul
Portuqaliya – Xorvatiya – 2:1
Qollar: Ronaldo, 68 (pen.), Ramuş, 90+4 – Perişiç, 53.
İsveçrə – Əlcəzair: Petkoviç keçmiş komandasına uduzdu
İsveçrə millisi 1/16 final mərhələsində Əlcəzairi 2:0 hesabı ilə məğlub edərək növbəti mərhələyə yüksəlib.
Murat Yakın əvvəlki oyunla müqayisədə start heyətində iki dəyişiklik edib. Vladimir Petkoviç isə uzun illər çalışdırdığı İsveçrəyə qarşı üç yeni futbolçuya şans verib. Görüşün 11-ci dəqiqəsində Manzambinin məhsuldar ötürməsini Breel Embolo qola çevirərək hesabı açıb.
İkinci hissənin əvvəlində Əlcəzair müdafiəsinin kobud səhvindən Dan Ndoye maksimum yararlanıb və fərqi iki topa çatdırıb. Qalan dəqiqələrdə Əlcəzair fərqi azaltmağa çalışsa da, İsveçrə müdafiəsi və qapıçı Qreqor Kobel etibarlı çıxış edib. Əks-hücumlarda isə isveçrəlilər hesabı daha da artıra bilərdilər.
Murat Yakının komandası 1/8 finalda Kolumbiya – Qana cütünün qalibi ilə üz-üzə gələcək.
2026 Dünya Çempionatı. Pley-off
1/16 final
İsveçrə – Əlcəzair – 2:0
Qollar: Embolo, 11, Ndoye, 46.
Xəbərdarlıqlar: Şaibi, 36, Budaoui, 72.
