2026-cı il dünya çempionatında H və G qruplarında II turun daha iki maraqlı qarşılaşması keçirildi. Kabo-Verde Uruqvayla heç-heçə edərək növbəti sürprizə imza atdı, Misir isə Məhəmməd Salahın liderliyi ilə Yeni Zelandiya üzərində əzmkar qələbə qazandı.
Mayamidə yerləşən “Hard Rock Stadium”da baş tutan H qrupu matçı Uruqvay və Kabo-Verde arasında 2:2 hesablı heç-heçə ilə yekunlaşdı. Oyuna fəal başlayan ada təmsilçisi 21-ci dəqiqədə hesabı açdı. Kabo-Verdenin dünya çempionatları tarixində ilk qolunu Kevin Lenini möhtəşəm cərimə zərbəsi ilə vuraraq komandasını önə çıxardı.
Lakin Uruqvayın cavabı gecikmədi. Marselo Byelsanın komandası fasiləyə qədər iki qol vuraraq hesabda önə keçməyi bacardı. İkinci hissədə isə Kabo-Verde yenidən oyuna qayıtdı. Uruqvay müdafiəsinin və qapıçı Fernando Musleranın səhvi nəticəsində 61-ci dəqiqədə hesab bərabərləşdi. Cənubi amerikalılar daha sonra üçüncü qolu vursalar da, hakim ofsayd səbəbindən qolu qeydə almadı.
İki turdan sonra H qrupunda 4 xalla İspaniya liderdir. Uruqvay və Kabo-Verdenin aktivində 2 xal var, Səudiyyə Ərəbistanı isə 1 xalla sonuncu pillədə qərarlaşıb.
H qrupu, II tur
Uruqvay – Kabo-Verde – 2:2
Qollar: Arauxo, 44, Kannobio, 45+6 – Lenini, 21, Varela, 61
Salahdan qol və məhsuldar ötürmə
G qrupunun qarşılaşmasında Yeni Zelandiya və Misir milliləri üz-üzə gəldi. Vankuverdəki “BC Place” stadionunda keçirilən görüş Misirin 3:1 hesablı qələbəsi ilə başa çatdı.
Matça daha yaxşı başlayan Yeni Zelandiya 15-ci dəqiqədə hesabı açsa da, ikinci hissədə oyunun axarı tamamilə dəyişdi. Misirlilər təşəbbüsü ələ alaraq ardıcıl üç qol vurdu və meydanı üç xalla tərk etdilər.
Qələbənin memarı komandanın kapitanı Məhəmməd Salah oldu. Təcrübəli hücumçu əvvəlcə 67-ci dəqiqədə fərqləndi, daha sonra isə 82-ci dəqiqədə vurulan qolda məhsuldar ötürmə ilə yadda qaldı. Salahın liderliyi altında Misir dünya çempionatında ilk qələbəsini qazandı.
Bu nəticədən sonra Misir 4 xalla G qrupunun zirvəsinə yüksəldi. İran və Belçikanın hərəsinin 2 xalı var. Yeni Zelandiya isə bir xalla sonuncu pillədə qərarlaşıb.
G qrupu, II tur
Yeni Zelandiya – Misir – 1:3
Qollar: Surman, 15 – Ziko, 58, Salah, 67, Trezege, 82
