WBO versiyası üzrə ağır çəki dərəcəsində dünya çempionu Daniel Dübua ilə keçmiş titul sahibi Fabio Vordli arasında revanş döyüşünün payızda keçirilməsi planlaşdırılır. Britaniya mətbuatının yaydığı məlumata görə, qarşılaşma üçün əsas işçi tarix kimi 17 oktyabr nəzərdə tutulub. Həmçinin döyüşün ilk görüş kimi Mançesterdəki Co-op Live Arenada baş tutacağı gözlənilir.
İlk qarşılaşmada Dübua 11-ci raundda texniki nokautla qalib gələrək WBO kəmərini qazanmışdı. Bundan sonra Fabio Vordli müqavilədə nəzərdə tutulan revanş hüququndan istifadə edib və tərəflər ikinci döyüşün təşkili istiqamətində danışıqları davam etdirirlər.
Frank Uorren: “Bir neçə məkanı nəzərdən keçiririk”
Queensberry Promotions-un rəhbəri Frank Uorren bildirib ki, revanşın oktyabr ayında keçirilməsi planlaşdırılır, lakin yekun məkan hələ təsdiqlənməyib.
“Döyüş oktyabrda olacaq. Sadəcə, keçiriləcəyi məkanı müəyyənləşdirməliyik. Hazırda bunun üzərində işləyirik və bir neçə variantı nəzərdən keçiririk. Düşünürəm ki, gələn həftə rəsmi elan veriləcək. İlk qarşılaşma möhtəşəm idi və revanşın da eyni səviyyədə keçəcəyinə inanıram”.
İlk görüş ağır çəkidə ilin ən baxımlı döyüşlərindən biri hesab olunurdu. Vordli döyüşün əvvəlində iki nokdaun qazansa da, təşəbbüsü sonradan ələ alan Dübua 11-ci raundda rəqibini dayandıraraq WBO çempionluğunu əldə etmişdi.
Hazırda tərəflər rəsmi müqavilənin son detallarını razılaşdırırlar. Əgər plan dəyişməzsə, Dübua və Vordli ikinci dəfə 17 oktyabrda üz-üzə gələcək və rəsmi təsdiqin yaxın günlərdə açıqlanacağı gözlənilir.
