Formula 1-də komanda sayının gələcəkdə yenidən artırılması ehtimalı gündəmə gəlib. Beynəlxalq Avtomobil Federasiyasının (FIA) prezidenti Məhəmməd Ben Sulayem bildirib ki, əgər çempionatda 12-ci komandanın yaradılması ilə bağlı qərar verilərsə, ən real namizədlərdən biri məhz Çin təmsilçisi ola bilər.
Le-Man yarışları öncəsi jurnalistlərlə söhbət edən FIA rəhbəri son illərdə Çin bazarının motorsporta marağının sürətlə artdığını vurğulayıb. Onun sözlərinə görə, əsas məsələ sadəcə yeni komanda əlavə etmək deyil, Formula 1-ə dəyər qatacaq doğru layihəni seçməkdir.
FIA Çindən yeni komanda gözləyir
Ben Sulayem bildirib ki, Çindən Formula 1-ə qoşulmaqla bağlı maraq ifadə olunub. FIA rəhbəri bu məsələyə münasibət bildirərkən deyib:
“Burada söhbət komanda sayını artırmaqdan yox, düzgün komandanı seçməkdən gedir. Hazırda belə bir potensialın Çində olduğunu görürük”.
Xatırladaq ki, Formula 1 2026-cı ildən etibarən 11 komanda ilə çıxış edir. ABŞ avtomobil nəhəngi Cadillac uzun müzakirələrdən sonra çempionata qoşulmaq hüququ əldə edib. Hazırkı qaydalara əsasən isə seriyada maksimum 12 komandanın iştirakı mümkündür.
BYD-nin adı gündəmdədir
Son aylarda Çinin avtomobil sənayesinin liderlərindən olan BYD şirkətinin Formula 1 layihəsinə maraq göstərdiyi barədə iddialar yayılıb.
Məlumata görə, BYD-nin vitse-prezidenti Stella Li bu il Formula 1-in rəhbəri Stefano Domenikali ilə bir neçə dəfə görüşüb. O, həmçinin Kann Film Festivalı zamanı sabiq Red Bull rəhbəri Kristian Hornerlə də müzakirələr aparıb.
Çində Formula 1-ə maraq son illərdə nəzərəçarpacaq dərəcədə artıb. Şanxay Qran-prisi pandemiyadan sonra 2024-cü ildə təqvimə qayıdıb, Quan Yu Çjou isə ölkənin ilk daimi Formula 1 pilotu kimi tarixə düşüb. Məhz bu amillər FIA-nın gələcək genişlənmə planlarında Çin layihələrinə xüsusi diqqət ayırmasına səbəb olur.
Bununla belə, yeni komandanın Formula 1-ə qoşulması üçün həm FIA-nın, həm də çempionat rəhbərliyinin yekun təsdiqi tələb olunur.
