Formula 1 rəhbərliyi 2027-ci il mövsümündən etibarən sprint yarışlarının sayını əhəmiyyətli dərəcədə artırmağı planlaşdırır. Məlumata görə, yaxın vaxtlarda açıqlanacaq yeni təqvimdə azarkeşlərin son illərdə böyük maraq göstərdiyi sprint formatına daha geniş yer veriləcək. Bu barədə Sky Sports məlumat yayıb.
Sprint həftəsonları daha çox olacaq
Hazırkı mövsümdə Formula 1 təqvimində altı sprint yarışı yer alır. Lakin 2027-ci ildən bu rəqəmin 9 və ya 10-a çatdırılması nəzərdə tutulur. Eyni zamanda, çempionatın ümumi təqviminin 24 Qran-pridən ibarət qalacağı gözlənilir.
Sprint formatı cəmi bir neçə mövsümdür tətbiq olunsa da, Formula 1 rəhbərliyi onun həm televiziya auditoriyası, həm də traslara gələn azarkeşlərin sayı baxımından müsbət nəticə verdiyini hesab edir. Məhz bu səbəbdən yarış həftəsonlarının daha çoxunda qısa məsafəli sprint mübarizələrinin keçirilməsi planlaşdırılır.
Məlumatlara əsasən, Formula 1 təşkilatçıları 2027-ci il mövsümünün tam təqvimini yaxın vaxtlarda təqdim edəcəklər. Təqvimdə həm ənənəvi Qran-prilər, həm də sprint formatında keçiriləcək mərhələlərin sayı dəqiqləşəcək. Rəsmi qərardan sonra hansı trasların sprint yarışlarına ev sahibliyi edəcəyi də məlum olacaq.
