“Bavariya”nın hücumçusu Harri Keyn 2025/2026 mövsümünün nəticələrinə əsasən karyerasında ikinci dəfə Avropanın “Qızıl buts” mükafatına sahib çıxıb. İngiltərə millisinin kapitanı Bundesliqada 36 qol vuraraq Avropanın aparıcı çempionatlarının bombardirləri arasında ən yüksək nəticəni göstərib.
Keyn bununla 2023/2024 mövsümündəki göstəricisini təkrarlayıb. O zaman da ingilis forvard Almaniya çempionatında 36 dəfə fərqlənərək ilk “Qızıl buts”unu qazanmışdı. Son mövsümdə isə onun göstəricisi Erlinq Holandın nəticəsindən 9, Kilian Mbappenin nəticəsindən 11 qol çox olub.
Keyn “Bavariya” ilə uğurlu mövsüm keçirdi
33 yaşlı hücumçu üçün builki mükafatın xüsusi əhəmiyyəti var. Keyn ilk “Qızıl buts”unu qazandığı 2023/2024 mövsümünü “Bavariya” ilə komanda titulu olmadan başa vurmuşdu. Bu dəfə isə Münhen klubu həm Bundesliqanın qalibi olub, həm də Almaniya Kubokunu qazanıb.
Kubokun finalında Keyn “Ştutqart” üzərində 3:0 hesablı qələbənin əsas qəhrəmanına çevrilib. Hücumçu ikinci hissədə het-trik edərək “Bavariya”ya tarixində 21-ci dəfə Almaniya Kubokunu qazandırıb.
Keyn həmçinin ardıcıl üçüncü mövsüm Bundesliqanın bombardiri olub. O, 2023/2024 mövsümündə 36, 2024/2025-də 26, 2025/2026 mövsümündə isə yenidən 36 qol vurub.
Mövsüm ərzində bütün turnirlərdə “Bavariya”nın heyətində 61 qol vuran ingilis futbolçu klub və milli komanda birlikdə 73 qola çatıb. Bu məhsuldarlıq Keynin 2026-cı ilin “Qızıl top” mükafatına əsas namizədlər sırasında göstərilməsinə də ciddi zəmin yaradıb.
Keyn 2023-cü ildə “Tottenhem”dən “Bavariya”ya keçdikdən sonra Münhen klubunun hücum xəttinin əsas simasına çevrilib. O, artıq Almaniya çempionatında keçirdiyi 94 qarşılaşmada 98 qol vurub.
