Peşəkar boksun ağır çəki dərəcəsində növbəti maraqlı çağırış səslənib. WBC versiyası üzrə müvəqqəti dünya çempionu Aqit Kabayel şəxsi Instagram hesabında paylaşım edərək təşkilatın əsas çempionu Aleksandr Usikə müraciət edib.
Almaniyalı boksçu ukraynalı rəqibini rinqə çıxmağa çağırıb və WBC kəməri ilə bağlı mövqeyini açıq şəkildə ifadə edib.
Ağır çəkidə son illərdə məğlubiyyət tanımayan Kabayel paylaşımında uzun müddətdir səbrlə növbəsini gözlədiyini bildirib. Onun sözlərinə görə, sadəcə qələbələr qazanmaq və gözləmək artıq kifayət deyil.
“Son vaxtlar öyrəndiyim bir şey var: insanları nokaut edib sakitcə gözləmək səni dünya çempionu etmir. Buna görə artıq susmayacağam. Həmişə hörmət çərçivəsində danışacağam. Heç bir təhqir və ya boş söz yoxdur, sadəcə real söhbət. Usik, gəl başlayaq. Ya döyüşü qəbul et, ya da kəməri boşalt”, – Kabayel Instagram paylaşımında yazıb.
Hazırda Aleksandr Usik WBC, WBA və IBF versiyaları üzrə dünya çempionudur. Aqit Kabayel isə WBC-nin müvəqqəti çempionu kimi təşkilatın əsas kəmərinə namizəd sayılır.
WBC-də növbəti addım nə olacaq?
Boks ictimaiyyətində Usiklə Kabayel arasında mümkün qarşılaşma son aylarda ən çox müzakirə olunan mövzulardan birinə çevrilib. WBC qaydalarına əsasən, müvəqqəti çempion müəyyən hallarda əsas çempionla məcburi titul döyüşü keçirmək hüququ əldə edir.
Hələlik Usik və ya onun komandası Kabayelin çağırışına münasibət bildirməyib. Bununla belə, ağır çəkidə titul mənzərəsinin yaxın aylarda daha da dəqiqləşəcəyi gözlənilir və WBC-nin bu məsələdə verəcəyi qərar maraqla gözlənilir.
