FİFA-nın Klublararası dünya çempionatının formatında növbəti dəyişiklik etməsi gündəmə gəlib. Məlumata görə, qurum Avropanın aparıcı klublarını təmsil edən European Football Clubs (EFC) təşkilatı ilə əməkdaşlığı genişləndirib və bunun nəticəsində 2029-cu ildən turnirin iştirakçı sayının 48 komandaya çatdırılması müzakirə olunur. Bu təşəbbüs reallaşacağı təqdirdə, yarışın həm kommersiya imkanlarının, həm də azarkeş marağının daha da artacağı gözlənilir.
Hazırkı formatda Klublararası dünya çempionatında 32 komanda iştirak edir və onlardan yalnız 12-si UEFA-nı təmsil edir. Məhz bu məhdudiyyət səbəbindən son turnirdə İngiltərə çempionu “Liverpul”, İspaniya çempionu “Barselona” və İtaliya çempionu “Napoli” kimi nüfuzlu klublar yarışdan kənarda qalmışdı. EFC hesab edir ki, Avropa təmsilçilərinin sayının artırılması həm idman baxımından rəqabəti yüksəldəcək, həm də turnirin gəlirlərinə müsbət təsir göstərəcək.
Məlumata əsasən, FİFA ilə EFC arasında əldə olunan əməkdaşlıq razılaşması 2029-cu il Klublararası dünya çempionatının yeni formatda keçirilməsi ehtimalını artırıb. Hazırda turnirin 48 komandalıq modelə keçidi və UEFA klubları üçün ayrılan kvotanın artırılması əsas müzakirə mövzularındandır. Bununla yanaşı, yarışın maliyyə gəlirlərinin bölüşdürülməsi və iştirakçı sayının artırılması ilə bağlı yekun qərarın yaxın illərdə qəbul ediləcəyi gözlənilir.
