“McLaren” pilotu Lando Norris Formula 1 üzrə Belçika Qran-prisində start cərgəsində 10 yer itirəcək. Buna səbəb bolidin güc qurğusunun komponentlərindən birinin dəyişdirilməsi və mövsüm üzrə icazə verilən limitin aşılmasıdır.
Komandanın qərarına əsasən, Norrisin bolidinə mövsümdə istifadə olunan icazə verilən saydan artıq – dördüncü enerji elektronikası bloku (power electronics) quraşdırılacaq. Formula 1 reqlamentinə görə isə bu komponentdən cəmi üç ədəd cəriməsiz istifadə etmək mümkündür. Məhz buna görə britaniyalı pilot Belçika mərhələsində 10 pilləlik start cəriməsi alıb.
“McLaren” bildirib ki, yeni komponent Mercedes-AMG High Performance Powertrains tərəfindən hazırlanmış etibarlılıq yeniləmələri ilə təchiz olunub. Komanda bu dəyişikliyi məhz Spa-Frankorşam trasında etməyə üstünlük verib, çünki burada ötmələrin daha asan həyata keçirilməsi cərimənin təsirini minimuma endirə bilər. Məqsəd yeni qurğunu mövsümün sonunadək istifadə edərək əlavə texniki problemlərin qarşısını almaqdır.
Xatırladaq ki, dünya çempionu mövsümün əvvəlindən etibarən elektronika sistemi ilə bağlı bir neçə problemlə üzləşmişdi. İlk nasazlıq Çin Qran-prisində onun yarışa başlamasına mane olmuşdu.
Daha sonra Yaponiya mərhələsində quraşdırılan ikinci blok da etibarlılıq problemi yaratmışdı. Məhz bu səbəbdən komanda yenilənmiş komponentdən istifadə etmək qərarı verib və bunun müqabilində start cəriməsini qəbul edib.
