Almaniya millisinin və dünya futbolunun əfsanəvi qapıçılarından olan Manuel Noyer beynəlxalq karyerasını başa vurduğunu rəsmən açıqlayıb. Təcrübəli qolkiper 2026-cı il dünya çempionatının 1/16 finalında Almaniyanın Paraqvaya penaltilər seriyasında uduzmasından sonra milli komandada son oyununu keçirdiyini təsdiqləyib. Beləliklə, uzun illər “Bundestim”in əsas simalarından biri olmuş 40 yaşlı futbolçu milli forma ilə çıxışlarına yekun vurub.
Almaniyanın Paraqvaya penaltilərdə məğlubiyyətindən sonra qərarını açıqladı
ARD telekanalına danışan Manuel Noyer 1/16 final mərhələsindəki məğlubiyyətdən sonra ona ünvanlanan “Bu, milli komandadakı son oyununuz idimi?” sualına qısa şəkildə “Bəli” cavabını verib. Bununla da o, Almaniya millisindəki karyerasının başa çatdığını rəsmən təsdiqləyib.
Qeyd edək ki, Noyer 2024-cü ilin avqustunda Avropa çempionatından sonra yığmadan ayrıldığını elan etmişdi. Lakin baş məşqçi Yulian Nagelsmannın dəvətini qəbul edərək 2026-cı il dünya çempionatı üçün yenidən Almaniya millisinin heyətinə qayıtmışdı.
Əfsanəvi karyera 128 oyunla yekunlaşdı
Manuel Noyer Almaniya millisinin heyətində ümumilikdə 128 oyun keçirib və ölkə futbol tarixinin ən uğurlu qapıçılarından biri kimi yadda qalıb. O, 2014-cü ildə Braziliyada keçirilən dünya çempionatında Almaniya yığmasının çempion olmasında əsas pay sahiblərindən biri idi.
Təcrübəli qolkiper uzun illər ərzində həm liderliyi, həm də oyun üslubu ilə qapıçı mövqeyinə yeni yanaşma gətirən futbolçulardan biri hesab olunur. Onun beynəlxalq karyerasını başa vurması Almaniya futbolunda bütöv bir dövrün sona çatması kimi qiymətləndirilir. Noyer bundan sonra diqqətini yalnız klub karyerasına yönəldəcək.
