“Real Madrid” və La Liqa arasında uzun müddətdir davam edən hüquqi mübahisədə növbəti mühüm qərar qəbul olunub. İspaniya Ali Məhkəməsi Madrid klubunun mövqeyini dəstəkləyərək daha əvvəl çıxarılmış qərarın qüvvədə qaldığını təsdiqləyib.
Klubun yaydığı açıqlamada bildirilir ki, məhkəmə La Liqa rəhbərliyinin 2022-ci ildə qəbul etdiyi bəzi qərarları qanunsuz hesab edib. Söhbət “Real Madrid”in audiovizual hüquqların idarə olunmasına nəzarət edən qurumun bir sıra iclaslarında iştirakına maneə yaradılmasından gedir.
Ali Məhkəmə La Liqanın etirazını rədd etdi
Məlumata görə, Ali Məhkəmənin Birinci Palatası hələ aprel ayında La Liqanın apellyasiya şikayətini təmin etməmişdi. Məhkəmə qərarında qeyd olunub ki, həmin məhdudiyyətlər klubun qanuni iştirak hüquqlarını pozub və müvafiq prosedurlara riayət edilmədən tətbiq olunub.
Bundan sonra La Liqa artıq qüvvəyə minmiş qərarın yenidən nəzərdən keçirilməsi üçün əlavə hüquqi mexanizmlərdən istifadə etməyə çalışsa da, bu cəhd də nəticəsiz qalıb. Ali Məhkəmə məsələ üzrə yekun hüquqi mövqeyini bir daha təsdiqləyərək işin yenidən açılmasına əsas olmadığını bildirib.
“Real Madrid” rəhbərliyi qərarı hüquqi müəyyənliyin və peşəkar futbol qurumlarında klubların hüquqlarına hörmət prinsipinin vacib təsdiqi kimi qiymətləndirib. Klub hesab edir ki, bu qərar idman idarəçiliyində şəffaflıq və bərabər təmsilçilik baxımından mühüm presedent yaradır.
