Bir müddət əvvəl “Sevilya”nın alınması ilə bağlı danışıqlar müsbət məcrada davam etsə də, indi Serxio Ramos və tərəfdaşlarının klubu almaq planının uğursuzluğa düçar olduğu bildirilir.
İspaniya mətbuatının yaydığı məlumata görə, əfsanəvi müdafiəçi və onun əməkdaşlıq etdiyi Argentina investisiya fondu “Five Eleven Capital” son anda təklif şərtlərində dəyişiklik edib. Bu isə klub rəhbərliyinin danışıqları dayandırmasına səbəb olub.
Tərəflər arasında fikir ayrılığı yarandı
Mənbənin məlumatına əsasən, Ramosun təmsil etdiyi investor qrupu əvvəlcə “Sevilya”nın təxminən 80 min səhmini almağa razılıq verib. Lakin son mərhələdə onlar daha az – təxminən 30 min səhm almaq və sonradan kapital artımı vasitəsilə klubda nəzarəti ələ keçirmək istədiklərini bildiriblər.
Hazırkı klub rəhbərliyi isə bu yanaşmanı qəbul etməyib. Bildirilir ki, səhmdarlar yeni təklifin əvvəlki razılaşmadan ciddi şəkildə fərqləndiyini və maliyyə baxımından klub üçün sərfəli olmadığını düşünüblər.
İspaniya mediası yazır ki, tərəflər arasında beş aya yaxın davam edən danışıqlar artıq tamamilə dayanıb və yaxın vaxtlarda yenidən bərpa olunması gözlənilmir.
Ramos “Sevilya” ilə əlaqəsini qoruyur
Serxio Ramos futbol karyerasına məhz “Sevilya” akademiyasında başlayıb. O, 2003-2005-ci illərdə əsas komandada çıxış etdikdən sonra “Real Madrid”ə transfer olunmuş və dünya futbolunun ən uğurlu müdafiəçilərindən birinə çevrilmişdi.
Təcrübəli futbolçu 2023/2024 mövsümündə yenidən doğma klubuna qayıtmışdı. İspaniya mətbuatı onun gələcəkdə “Sevilya”nın idarəçiliyində mühüm rol almaq istədiyini yazırdı.
Hazırda isə klubun satışı ilə bağlı proses qeyri-müəyyən olaraq qalır. “Sevilya” rəhbərliyinin başqa investor variantlarını da nəzərdən keçirdiyi bildirilir.
