Böyük Britaniyada keçirilən Uimbldon-2026 turnirində kişilərin tək oyunlar üzrə 1/8 final mərhələsinin yuxarı hissəsində qarşılaşmalar başa çatıb. Günün nəticələrindən sonra turnirin ilk iki 1/4 final cütlüyü dəqiqləşib. Dünya reytinqinin lideri Yannik Sinner və 24 qat “Grand Slam” çempionu Novak Cokoviç növbəti mərhələyə vəsiqə qazanıblar.
Sinner inamlı qələbə qazanaraq növbəti mərhələdə Yan-Lennard Ştruffla üz-üzə gələcək. Digər tərəfdə isə Novak Cokoviç Feliks Oje-Alyassimlə qarşılaşacaq. Turnirin aşağı hissəsində 1/8 final oyunları isə növbəti oyun günündə keçiriləcək.
Cokoviç yeni rekorda imza atdı
Novak Cokoviç seçmə mərhələdən əsas yarışa yüksələn Roman Safiullini dörd setdə məğlub edərək Uimbldondakı 106-cı qələbəsini qazandı. Bununla da serbiyalı tennisçi London turnirində ən çox qələbə qazanan oyunçu kimi Rocer Federerin 105 qələbəlik rekordunu geridə qoydu.
Kanadalı Feliks Oje-Alyassim isə gərgin keçən beş setlik qarşılaşmada Alexandro Davidoviç Fokinanı məğlub edərək Cokoviçin rəqibi oldu. Son setdə kanadalı rəqibinə cəmi bir geym verdi.
Ştruff ilk dəfə “Grand Slam”ın 1/4 finalında
Yannik Sinner yapon tennisçi Şintaro Moçizukini üç setdə üstələyərək karyerasında növbəti dəfə “Grand Slam” turnirinin 1/4 finalına yüksəldi.
Almaniyalı Yan-Lennard Ştruff isə Hubert Hurkaçla dramatik görüşdə əzmkar qələbə qazandı. İlk iki seti uduzan Ştruff geri dönüş etdi, həlledici setdə isə polşalı tennisçi zədə səbəbindən oyunu davam etdirə bilmədi. 36 yaşlı alman ilk dəfə karyerasında “Grand Slam” turnirinin 1/4 finalına yüksəldi.
Uimbldon-2026 – 1/8 finalın nəticələri
Yuxarı hissə
- Hubert Hurkaç – Yan-Lennard Ştruff – 6:3, 7:6 (7:5), 6:7 (2:7), 5:7, 2:4, RET. (Hurkaç)
- Yannik Sinner (1) – Şintaro Moçizuki (Q) – 6:3, 7:6 (7:0), 6:3
- Feliks Oje-Alyassim (3) – Alexandro Davidoviç-Fokina (22) – 6:7 (4:7), 7:6 (10:8), 6:3, 6:7 (2:7), 6:1
- Roman Safiullin (Q) – Novak Cokoviç (7) – 6:7 (6:8), 3:6, 6:3, 3:6
Uimbldon-2026 – 1/4 final cütlükləri
Turnir cədvəlinin yuxarı hissəsi
- Yannik Sinner (1) – Yan-Lennard Ştruff
- Feliks Oje-Alyassim (3) – Novak Cokoviç (7)
