UFC çempionu İlia Topuria növbəti sərt açıqlaması ilə diqqət çəkib. Gürcü əsilli ispaniyalı döyüşçü mümkün rəqiblərindən sayılan Arman Tsarukyan barədə danışaraq onun səviyyəsini açıq şəkildə tənqid edib və ehtimal olunan döyüşün nəticəsi ilə bağlı iddialı proqnoz verib.
Topuria bildirib ki, Tsarukyanın son davranışları daha çox diqqət çəkməyə hesablanıb və real gücünü əks etdirmir. Onun sözlərinə görə, rəqibi mediada və sosial şəbəkələrdə özünü fərqli təqdim edir, lakin real qarşılaşmalarda bu görüntü dəyişir.
UFC çempionu xüsusilə Tsarukyanın həyat tərzinə toxunaraq, maddi imkanların döyüşçünü böyük etmədiyini vurğulayıb:
“Bahalı avtomobillər və pul nümayiş etdirmək heç nəyi dəyişmir. Bunlar səni güclü və ya böyük etmir. Ən vacibi insanın daxili keyfiyyətləridir”.
Topuria əlavə edib ki, sosial şəbəkələrdə sərt görünmək asandır, lakin real döyüşdə bu keyfiyyətlər özünü doğrultmalıdır:
“İnternetdə hər kəs özünü sərt göstərir. Amma üz-üzə gələndə çoxları tamam fərqli davranır”.
Mümkün qarşılaşma barədə danışan Topuria rəqibinə qarşı özünəinamını açıq şəkildə ifadə edib. O hesab edir ki, Tsarukyan onun səviyyəsində deyil və rinqdə bunu sübut etməyə hazırdır:
“Arman mənim səviyyəmə uyğun döyüşçü deyil. Əgər qarşılaşsaq, ilk raundda onun çənəsini qıraram”.
Topuria bildirib ki, indiyə qədər verdiyi bütün vədləri qəfəsdə doğruldub və gələcəkdə də eyni xətti davam etdirəcək. Onun bu açıqlamaları iki döyüşçü arasında mümkün qarşılaşmaya marağı daha da artırıb.
