“Trabzonspor”un yay transfer pəncərəsində heyətinə qatdığı misirli ulduz Məhəmməd Salah Türkiyədə yaşayacağı ünvanla bağlı qeyri-adi jestlə qarşılaşacaq. Trabzonun Yomra rayonunda futbolçunun məskunlaşacağı küçəyə onun adının verilməsi planlaşdırılır.
Salah Yomranın Kaşüstü məhəlləsində yaşayacaq. Hazırda onun məskunlaşacağı evdə təmir işləri davam edir və işlər tamamlandıqdan sonra futbolçunun yaxın zamanda yeni ünvanına köçəcəyi gözlənilir. Evin yerləşdiyi Selvi küçəsinin adının isə “Məhəmməd Salah küçəsi” olaraq dəyişdirilməsi üçün məsələ bələdiyyə məclisinin gündəliyinə çıxarılacaq.
Bələdiyyə Salahın adını Yomrada yaşatmaq istəyir
Yomra bələdiyyəsinin sədri Mustafa Bıyık dünya futbolunun tanınmış simalarından birinin rayonda yaşayacaq olmasını əlamətdar hadisə kimi qiymətləndirib.
“Salah təkcə “Trabzonspor” tarixinin deyil, Türkiyə futbolu tarixinin də ən mühüm transferlərindən biridir. Dünya futbolunun belə böyük ulduzunun Yomrada yaşayacağından böyük qürur və xoşbəxtlik duyuruq. Yomranın Salahın yaşayış məkanı olması rayonumuzun brend dəyərinə də mühüm töhfə verəcək. Dünyada tanınan futbolçunun Yomrada yaşaması bizim üçün xüsusi hadisədir. Buna görə də Salahın adını yaşayacağı küçəyə verərək bu dövrü Yomranın tarixində qalıcı etmək istəyirik”, – deyə Bıyık bildirib.
Küçənin adının dəyişdirilməsi ilə bağlı qərarın bu həftə Yomra bələdiyyə məclisində qəbul edilməsi gözlənilir.
