Şahmat üzrə keçmiş dünya çempionları Veselin Topalov və Harri Kasparov ABŞ-nin Sent-Luis şəhərində keçirilən “Clutch Chess: The Legends” sərgi matçında üz-üzə gəliblər. Üç gün davam edən qarşılaşmanın yekununda bolqarıstanlı qrossmeyster 16:8 hesabı ilə qalib gəlib.
Turnir “Chess960” — Fişer şahmatı formatında keçirilib. Qrossmeysterlər ümumilikdə 12 partiya oynayıblar: onların altısı rapid, altısı isə blits olub. Rapid görüşlərində vaxt nəzarəti 25 dəqiqə + hər gedişə 10 saniyə, blitsdə isə 5 dəqiqə + 3 saniyə təşkil edib. Hər oyun günündə şahmat fiqurlarının yeni başlanğıc mövqeyi müəyyənləşdirilib.
Son gündə Kasparov geri dönüşə yaxınlaşdı
Yarışın qeyri-adi xüsusiyyətlərindən biri xal sisteminin hər gün dəyişməsi idi. İlk gündə qələbəyə 1, heç-heçəyə 0,5 xal verilirdi. İkinci gündə bu göstəricilər müvafiq olaraq 2 və 1, həlledici gündə isə 3 və 1,5 xala yüksəlirdi.
Topalov ilk günü 2,5:1,5 hesablı üstünlüklə tamamlayıb.
İkinci gündə bolqar şahmatçı xüsusilə blits partiyalarında uğurlu çıxış edərək ümumi hesabda fərqi 8,5:3,5-ə çatdırıb.
Kasparov üçüncü günün ilk rapid partiyasında qələbə qazanaraq geri dönüş üçün şans yaradıb. Növbəti rapid qarşılaşması heç-heçə ilə yekunlaşıb və hesab 10:8 olub.
Lakin son iki blits partiyasında Topalov yenidən üstünlüyü ələ keçirib. O, 11-ci partiyanı qazanaraq matçın qalibini vaxtından əvvəl müəyyənləşdirib, daha sonra isə son görüşdə də Kasparovu məğlub edib. Beləliklə, yekun hesab 16:8 olub.
Topalov 90 min dollar qazandı
Bolqarıstanlı qrossmeyster blits partiyalarında xüsusilə böyük üstünlük nümayiş etdirib. Xüsusi xal sistemi nəzərə alınmaqla Topalov blits görüşlərində mümkün 12 xaldan 11-ni toplayıb.
“Clutch Chess: The Legends” matçının ümumi mükafat fondu 144 min dollar təşkil edib. Qalib üçün əsas mükafat 70 min, ikinci yer üçün isə 50 min dollar müəyyənləşdirilmişdi. Ayrı-ayrı partiyalardakı qələbələrə görə əlavə bonuslar da nəzərdə tutulmuşdu.
Nəticədə Topalov turnirdən ümumilikdə 90 min dollar, Kasparov isə 54 min dollar qazanıb.
Hər iki qrossmeyster şahmat tarixində dünya çempionu kimi iz qoyub. Kasparov 1985-ci ildə Anatoli Karpovu məğlub edərək dünya çempionu olub və uzun illər şahmatın əsas simalarından biri sayılıb. Topalov isə 2005-ci ildə FIDE dünya çempionu titulunu qazanıb. Bir il sonra o, Vladimir Kramniklə birləşdirici dünya çempionluğu matçında məğlub olub.
Kasparov üçün “Clutch Chess: The Legends” tanış formatdır. O, 2025-ci ildə yarışın əvvəlki buraxılışında digər keçmiş dünya çempionu Vişvanatan Anandla qarşılaşmış və 13:11 hesabı ilə qalib gəlmişdi.
