Qəbələdə III Beynəlxalq Xankəndi Ultramarafonuna start verilib. Oktyabrın 8-dən 11-dək davam edəcək yarışda 5 ölkədən 97 atlet 192 kilometrlik marşrut üzrə mübarizə aparacaq. İştirakçılar dörd mərhələni tamamlayaraq Xankəndidə finişə çatmağa çalışacaqlar.
Gənclər və İdman Nazirliyi, Azərbaycan Atletika Federasiyası və Bakı Şəhər Halqasının birgə təşkil etdiyi yarışın açılışı rəsmi mərasimlə başlayıb.
Əvvəlcə Heydər Əliyevin Qəbələdəki abidəsi ziyarət olunub, önünə güllər düzülüb. Daha sonra Dövlət Himni səsləndirilib və şəhidlərin xatirəsi bir dəqiqəlik sükutla anılıb.
Gənclər və İdman Nazirliyinin nümayəndəsi Elnur Məmmədov yarışın əhəmiyyətini vurğulayıb. Azərbaycan Atletika Federasiyasının baş katibi Məhərrəm Sultanzadə isə beynəlxalq iştirakın atletikaya marağın artması baxımından müsbət olduğunu bildirib.
Ultramarafonun 192 kilometrlik marşrutu
İdmançılar Qəbələdən Xankəndiyə qədər dörd mərhələdə yarışacaqlar. Marşrut aşağıdakı kimi müəyyənləşdirilib:
- Qəbələ – Ağdaş: 55 km
- Ağdaş – Bərdə: 65 km
- Bərdə – Ağdam: 44 km
- Ağdam – Xankəndi: 28 km
Hər mərhələnin qalibləri ayrıca mükafatlandırılacaq. Dörd mərhələnin yekun nəticələrinə əsasən isə ultramarafonun ümumi qalibləri müəyyənləşdiriləcək.
Yarışın əsas məqsədi sağlam həyat tərzini və qaçış idmanını təşviq etmək, Azərbaycanın müxtəlif bölgələrini beynəlxalq idman tədbirləri vasitəsilə tanıtmaqdır.
Xankəndi Ultramarafonunun iştirakçı sayı artır
Beynəlxalq yarış ilk dəfə 2024-cü ildə Xankəndi–Bakı istiqamətində keçirilib. Həmin vaxt 380 kilometrlik məsafədə 4 ölkədən 64 atlet mübarizə aparıb.
2025-ci ildə marşrut dəyişdirilərək Qəbələ–Xankəndi istiqaməti seçilib. İkinci yarışda 6 ölkədən 81 idmançı iştirak edib.
Bu il isə ultramarafon üçün 97 atlet start xəttinə çıxıb. Yarış oktyabrın 11-də Xankəndidə başa çatacaq.
