Azərbaycan 2-ci Liqasında 5-ci turun son iki qarşılaşması bu gün keçiriləcək. “Dinamo” “Marafon”la, “Difai” isə “Qaradağ Lökbatan”la üz-üzə gələcək.
Günün ilk matçı Binə qəsəbə stadionunda baş tutacaq. İkinci pillədə qərarlaşan “Marafon” lider “Şirvan”dan geri qalmamaq üçün “Dinamo” ilə səfər görüşündə qələbə qazanmağa çalışacaq. Bakı təmsilçisi isə üç xal əldə etməklə həm yuxarı pillələrə yaxınlaşmaq, həm də birbaşa rəqibi ilə xal fərqini azaltmaq imkanına sahibdir.
“Qaradağ Lökbatan” ikinci pilləyə yüksələ bilər
Turun son qarşılaşmasında “Difai” və “Qaradağ Lökbatan” üz-üzə gələcəklər. Matç “Palms Sports Arena”nın 4-cü meydançasında keçiriləcək. “Qaradağ Lökbatan” “Marafon”un xal itirəcəyi halda öz oyununda qələbə qazanaraq liderin ən yaxın izləyicisinə çevrilmək imkanı əldə edə bilər.
Turun ilk günündə dörd qarşılaşma keçirilib. “Zəngəzur” “Kür-Araz”ı 5:1, “Hypers” “Şəki”ni 5:0, lider “Şirvan” isə “Şəmkir”i 3:2 hesabı ilə məğlub edib. “Ağstafa Gəncləri” ilə “Ağdaş”ın görüşü də məhsuldar keçib və meydan sahibləri 4:3 hesablı qələbə qazanıblar.
2-ci Liqa, 5-ci tur
29 sentyabr
“Dinamo” – “Marafon” – 15:30
- Hakimlər: Sənan Bayramzadə, Sevda Nuriyeva, Sadiq Əliyev, Ləman Əmirli
- Hakim-inspektor: Feyzulla Feyzullayev
- AFFA nümayəndəsi: Erkin Hüseynov
- Binə qəsəbə stadionu
“Difai” – “Qaradağ Lökbatan” – 15:30
- Hakimlər: Hacıağa Həsənov, Vüsal Xəlilzadə, İlkin Mustafazadə, Fəridə Lütfəliyeva
- Hakim-inspektor: Ömər Paşayev
- AFFA nümayəndəsi: Törə Əhmədova
- “Palms Sports Arena” (4-cü meydança)
