Misli Premyer Liqasının VII turunda “Sabah” komandası ilə “Karvan-Yevlax” arasında baş tutan oyunda ciddi zədə alan “Sabah”ın futbolçusu Coy-Lens Mikelsin sağlamlıq vəziyyəti barədə yeni məlumatlar açıqlanıb. İstinadla xəbər verir ki, geniş tibbi müayinədən keçən Mikelsin daxili orqanlarında ciddi problem və ya qanaxma aşkarlanmayıb. Lakin həkimlərin rəyinə əsasən, onun qabırğasında əzilmə var və bərpa müddəti yaxın günlərdə müəyyənləşdiriləcək.
Mikels oyunun sonlarında rəqib qapıçı Kamran İbrahimovla toqquşduqdan sonra təcili xəstəxanaya aparılıb. Klubun mətbuat xidmətinin rəhbəri Elnur Həmidov bildirib ki, almaniyalı futbolçu hazırda özü yaxşı hiss edir və dəqiq diaqnoz MRT müayinəsindən sonra məlum olacaq.
Qeyd edək ki, həmin oyunda “Sabah” 2:0 hesabı ilə qalib gəlib və Mikels penaltidən hesabı açan qolun müəllifi olub. Futbolçunun sağlamlıq durumuna dair əlavə məlumatlar yaxın zamanda ictimaiyyətə təqdim olunacaq.
