“Zirə” komandasının baş məşqçisi Rəşad Sadıqov Azərbaycan çempionatında əlamətdar göstəriciyə imza atıb. Peşəkar Futbol Liqasının rəsmi məlumatına əsasən, təcrübəli mütəxəssis qəsəbə təmsilçisinin sükanı arxasında Premyer Liqada 200-cü matçına çıxıb.
İnamlı qələbə ilə yaddan qalan yubiley görüşü və baş məşqçinin 6 mövsümlük statistikası aşağıdakı kimidir:
- III tur çərçivəsində keçirilən 200-cü qarşılaşmada “Zirə” “Neftçi”ni 1:0 hesabı ilə məğlub edib.
- 2020-ci ilin yayından komandaya rəhbərlik edən mütəxəssis bu müddətdə 89 qələbə, 62 heç-heçə və 49 yenilgi yaşayıb.
- Bu oyunlar ərzində qəsəbə kollektivi 247 dəfə fərqlənib, öz qapısından isə 187 top buraxıb.
Rəşad Sadıqovun “Zirə”dəki baş məşqçi debütü 2020-ci il avqustun 23-nə təsadüf edir. Həmin vaxt “Qəbələ”yə qarşı səfərdə keçirilən görüş 1:1 hesablı bərabərliklə yekunlaşmışdı.
