Misli Premyer Liqasının IV turunda keçiriləcək “Kəpəz” – “Şamaxı” qarşılaşmasına azarkeşlərin böyük marağı var. Biletlərin satışa çıxarılmasından cəmi bir gün sonra 4000-dən çox bilet alınıb.
Matç sentyabrın 4-də Gəncə şəhər stadionunda keçiriləcək. Qarşılaşmanın start fiti saat 20:15-də səslənəcək.
“Kəpəz” bu görüş üçün biletlərin qiymətini əvvəlki ev matçı ilə müqayisədə aşağı salıb. Sektordan asılı olaraq biletlərin qiyməti 2–20 manat arasında dəyişir. Azarkeşlər biletləri həm onlayn, həm də Gəncə şəhər stadionunun kassalarından əldə edə bilirlər.
Gəncədə növbəti yüksək azarkeş sayı gözlənilir
“Kəpəz”in Gəncədə keçirdiyi son qarşılaşma da böyük azarkeş marağı ilə yadda qalıb. Komandanın avqustun 30-da “Turan Tovuz”u 1:0 hesabı ilə məğlub etdiyi oyunu stadiondan 13 500 tamaşaçı izləyib. Bu göstərici cari mövsümün rekordudur və Azərbaycan çempionatlarında son 10 ilin ikinci ən yüksək tamaşaçı göstəricisi kimi qeydə alınıb.
“Şamaxı” ilə matça ilk gündəcə 4000-dən çox biletin satılması Gəncədə növbəti dəfə yüksək azarkeş sayının qeydə alına biləcəyini göstərir.
IV tur ərəfəsində “Kəpəz” üç xalla turnir cədvəlinin 7-ci, “Şamaxı” isə iki xalla 9-cu pilləsində qərarlaşıb. Buna görə qarşılaşma hər iki komanda üçün turnir cədvəlində mövqeyini yaxşılaşdırmaq baxımından əhəmiyyət daşıyır.
