Azərbaycan I Liqasının II turunda təşkilati məsələlərlə bağlı bir sıra çatışmazlıqlar qeydə alınıb. AFFA İntizam Komitəsi üç klubun iştirak etdiyi oyunlarda aşkarlanan pozuntulara görə maliyyə sanksiyaları tətbiq edib.
Qərarlara əsasən, nöqsanlar matç protokolunun elektron bazada vaxtında təsdiqlənməməsi, futbolçuların formasındakı problemlər, texniki zonada icazəsiz şəxslərin olması və qarşılaşmadan sonra kənar şəxslərin meydana daxil olması ilə bağlıdır.
Təşkilati nöqsanlara görə ilk cərimələr
Sentyabrın 9-da keçirilən “Şahdağ Qusar” – “Karvan-Yevlax” qarşılaşması başa çatdıqdan sonra meydana kənar şəxslərin daxil olması meydan sahibinə 750 manat cərimə ilə nəticələnib.
Sentyabrın 10-da baş tutan “Zaqatala” – “Baku Sportinq” oyununda iki ayrı pozuntu qeydə alınıb. “Zaqatala” ilkin protokolu elektron bazada gec təsdiqlədiyinə görə 450 manat cərimələnib. Futbolçuların formasında yaranan problem səbəbindən matçın gec başlamasına görə kluba daha 450 manat cərimə tətbiq olunub. Beləliklə, “Zaqatala” ümumilikdə 900 manat ödəməli olacaq.
Ən böyük cərimə 1500 manat oldu
“Gəncəbasar” – “Xankəndi” qarşılaşması ilə bağlı isə üç ayrı nöqsan qeydə alınıb. “Gəncəbasar” ilkin protokolu elektron bazada gec təsdiqlədiyinə görə 450 manat cərimə olunub.
Oyundan sonra kənar şəxslərin meydana daxil olması kluba əlavə 750 manata başa gəlib. Bundan başqa, “A buraxılışı” olmayan şəxslərin texniki zonada olması səbəbindən daha 300 manat cərimə tətbiq edilib.
Beləliklə, “Gəncəbasar”ın ümumi cəriməsi 1500 manat təşkil edib. II turun sözügedən üç oyunu üzrə klublara tətbiq olunan maliyyə sanksiyalarının ümumi məbləği 3150 manata çatıb.
Qeyd edək ki, mövsümün əvvəlində də təşkilati nöqsanlara görə cərimələr qeydə alınıb. I turun MOİK – “Şahdağ Qusar” oyununda MOİK ilkin protokolun gec təsdiqlənməsinə görə 450, texniki zonada “A buraxılışı” olmayan şəxsin olmasına görə isə 300 manat cərimələnmişdi.
