Bu gün Azərbaycan futbolunda diqqətlər ölkə kubokunun yarımfinal mərhələsinə yönələcək. “Sabah” və “Qarabağ” komandaları cavab görüşündə üz-üzə gələrək finala yüksələcək ikinci komandanı müəyyən edəcək. Qarşılaşma həm turnirin taleyi, həm də mövsümün ən vacib oyunlarından biri kimi dəyərləndirilir.
İlk oyunda qeydə alınan 2:2 hesablı heç-heçə bu cütün taleyini tam açıq saxlayıb. Bu isə cavab matçını daha da gərgin və prinsipial edir. Hər iki komanda finala yüksəlmək üçün maksimum gücünü ortaya qoymağa hazırlaşır.
Həlledici duel və final bileti
“Sabah” və “Qarabağ” arasında baş tutacaq görüş Bakıdakı “Bank Respublika Arena”da keçiriləcək və saat 20:00-da start götürəcək. Oyunu baş hakim Rəvan Həmzəzadə idarə edəcək. İlk matçdakı nəticə nəzərə alınarsa, tərəflərdən hər hansı biri kiçik üstünlüklə belə qələbə qazansa, finala vəsiqə əldə edəcək.
Finala yüksələcək komandanın rəqibi artıq bəllidir. “Zirə” yarımfinalda “Turan Tovuz”u mübarizədən kənarlaşdıraraq həlledici mərhələyə adını yazdırıb. Bakı təmsilçisi ilk görüşdə 2:0 hesablı qələbə qazanmış, cavab oyununda isə qolsuz bərabərliklə üstünlüyünü qoruyub.
Azərbaycan Kubokunun final oyununun mayın 13-də “Palms Sports Arena”da keçirilməsi planlaşdırılır. Turnirin həlledici mərhələsinə yaxınlaşdıqca komandalar üzərində təzyiq artır və hər səhv baha başa gələ bilər.
