Bakıda keçiriləcək UFC turnirinə maraq gözləniləndən də böyük olub. İyunun sonunda təşkil olunacaq nüfuzlu döyüş gecəsi təkcə yerli azarkeşlərin deyil, dünyanın müxtəlif ölkələrindən gələcək MMA həvəskarlarının da diqqət mərkəzindədir.
Məlumata görə, artıq satışa çıxarılan biletlərin təxminən yarısı xarici vətəndaşlar tərəfindən əldə edilib. Bu isə yarışın beynəlxalq səviyyədə ciddi maraq doğurduğunu göstərir. Turnir zamanı paytaxtda onlarla ölkədən qonağın olması gözlənilir ki, bu da idman turizmi baxımından əhəmiyyətli göstərici hesab olunur.
Təşkilatçılar bildirirlər ki, bilet satışı yüksək templə davam edir və ötən ilin analoji dövrü ilə müqayisədə daha sürətli dinamika müşahidə olunur.
Ən çox bilet alan ölkələr sırasında ABŞ, Böyük Britaniya, Almaniya, Türkiyə, Qazaxıstan və İsrail yer alır. Ümumilikdə isə döyüş gecəsinə giriş biletləri dünyanın 67 ölkəsindən olan azarkeşlər tərəfindən satın alınıb. Yarış gününədək bu rəqəmin daha da artacağı istisna edilmir.
Bakıda ilk dəfə keçiriləcək UFC tədbiri Azərbaycanın beynəlxalq idman yarışlarına ev sahibliyi təcrübəsinə daha bir mühüm əlavə hesab olunur. Son illərdə Formula 1, böyük futbol matçları və digər nüfuzlu turnirlərin keçirilməsi paytaxtın qlobal idman xəritəsində mövqeyini gücləndirib.
“UFC Fight Night” turniri iyunun 27-də Milli Gimnastika Arenasında təşkil olunacaq. Dünyanın ən məşhur MMA təşkilatının Bakıya gəlişi həm idman ictimaiyyəti, həm də azarkeşlər arasında böyük maraq yaradıb.
