Azərbaycan Futbol Federasiyaları Assosiasiyası (AFFA) FIFA-nın hazırladığı yeni inkişaf proqramı təsdiqlənəcəyi təqdirdə, qarşıdakı illərdə futbolun inkişafı üçün 40 milyon ABŞ dollarına qədər maliyyə vəsaiti əldə edə bilər. Yeni təşəbbüs FIFA-ya üzv olan 211 milli assosiasiyanın infrastruktur, uşaq-gənclər futbolu, qadın futbolu və milli komandalar üzrə layihələrinin daha geniş şəkildə maliyyələşdirilməsini nəzərdə tutur.
FIFA prezidenti Canni İnfantinonun irəli sürdüyü plana əsasən, 2027-ci il yanvarın 1-dən başlayacaq növbəti dördillik dövr ərzində hər bir milli federasiyaya maksimum 40 milyon dollar ayrılması mümkündür.
Bunun 20 milyon dolları xüsusi layihələr üçün nəzərdə tutulan “FIFA Fast Forward” mexanizmi, digər 20 milyon dolları isə 2027–2030-cu illəri əhatə edən “FIFA Forward” proqramı çərçivəsində təqdim ediləcək. Hazırkı maliyyələşdirmə paketində bu proqram üzrə federasiyalar üçün təxminən 8 milyon dollar ayrılması planlaşdırılır.
Yeni kommersiya modeli müzakirələrə səbəb olub
Layihənin maliyyələşdirilməsi məqsədilə FIFA “FIFA Forward Enterprise” (FFE) adlı yeni kommersiya şirkəti yaratmağı planlaşdırır. Bu strukturun tərkibində televiziya yayım hüquqları, sponsorluq müqavilələri, bilet satışı, lisenziyalaşdırma və beynəlxalq turnirlərin kommersiya gəlirləri bir mərkəzdə idarə olunacaq.
İlkin qiymətləndirmələrə görə, yeni şirkətin bazar dəyəri təxminən 20 milyard ABŞ dolları təşkil edə bilər. FIFA azlıq payının xarici investorlara satılması hesabına 4,2 milyard dollara qədər investisiya cəlb etməyi planlaşdırır. Bununla yanaşı, təşkilat futbolun idarə olunması, yarışların təşkili və beynəlxalq təqvimin müəyyənləşdirilməsi ilə bağlı bütün əsas səlahiyyətlərin özündə qalacağını vurğulayır.
Məlumata görə, Canni İnfantino artıq milli federasiyalara müraciət edərək sentyabrın 19-dək layihəyə münasibətlərini bildirmələrini istəyib. Təşəbbüs təsdiqlənərsə, növbəti dörd il ərzində futbolun inkişafına ayrılacaq ümumi maliyyə paketinin 10 milyard dollara çatacağı gözlənilir. Planın qüvvəyə minməsi üçün FIFA Şurasının və üzv assosiasiyaların əksəriyyətinin dəstəyi tələb olunur.
Layihə artıq futbol ictimaiyyətində geniş müzakirələrə səbəb olub. UEFA şəffaflıq məsələləri ilə bağlı narahatlığını ifadə edib və futbolun əsas kommersiya aktivlərinin yeni model üzrə idarə olunmasına ehtiyatla yanaşdığını bildirib. FIFA isə əksinə, bu təşəbbüsün xüsusilə maliyyə imkanları məhdud olan ölkələrdə futbol infrastrukturunun gücləndirilməsinə, uşaq-gənclər və qadın futbolunun inkişafına ciddi təkan verəcəyini hesab edir.
