“Gəncə Open-2026” Beynəlxalq Şahmat Festivalında iştirakçılar ümumilikdə 24 810 manatlıq mükafat fondu uğrunda mübarizə aparacaqlar. Yarış Gəncə İdman Sarayında təşkil olunacaq və proqramına klassik şahmatla yanaşı rapid və blits turnirləri də daxil ediləcək.
Festivalda klassik şahmat üzrə iştirakçılar reytinq göstəricilərinə əsasən iki qrupa bölünəcəklər. A qrupunda reytinqi 1900 və daha yüksək olan, B qrupunda isə reytinqi 1899 və aşağı olan şahmatçılar çıxış edəcəklər.
Ən böyük mükafat fondu A qrupuna ayrılıb
Ümumi mükafat fondunun əsas hissəsi klassik şahmat yarışlarının payına düşür. A qrupunda 16 700 manat, B qrupunda isə 5 810 manat mükafat veriləcək. Rapid və blits turnirlərinin hər biri üçün 1 150 manat ayrılıb.
A və B qruplarında birinci yeri tutan şahmatçılara pul mükafatı ilə yanaşı xüsusi kubok da təqdim ediləcək. Festivalda qadınlar, müxtəlif yaş qrupları və ayrı-ayrı reytinq kateqoriyaları üzrə fərqlənən iştirakçılar üçün də əlavə mükafatlar nəzərdə tutulub.
Klassik şahmat üzrə A və B qruplarında yarışlar İsveçrə sistemi ilə 9 turdan ibarət olacaq. Hər partiyada şahmatçılara 90 dəqiqə vaxt veriləcək və hər gedişdən sonra əlavə 30 saniyə hesablanacaq.
Rapid və blits turnirləri də keçiriləcək
Festivalın rapid yarışında 7 tur oynanılacaq. Burada vaxt nəzarəti hər iştirakçı üçün 10 dəqiqə və hər gedişə əlavə 3 saniyə olacaq. Blits turniri isə 9 turdan ibarət keçiriləcək, şahmatçılar hər partiya üçün 3 dəqiqə və hər gedişə əlavə 2 saniyə əldə edəcəklər.
“Gəncə Open-2026” Azərbaycan Şahmat Federasiyasının “Chess Tour Azerbaijan” layihəsinin turnirlərindən biridir. Layihə beynəlxalq yarışların ölkənin müxtəlif şəhərlərində təşkilinə, yerli şahmatçıların daha çox turnir təcrübəsi qazanmasına və şahmatın regionlarda inkişafına xidmət edir.
