Azərbaycanın tanınmış iş adamı, “Bakı” futbol klubunun keçmiş prezidenti Hafiz Məmmədov (ictimaiyyət arasında “Hafka” kimi tanınan) və “Qarabağ”ın sükanı arxasında uğurlar qazanan baş məşqçi Qurban Qurbanov eyni məclisdə iştirak ediblər. Onların görüşü məşhur güləşçi Hacı Əliyevin doğum günü şənliyində baş tutub.
Sport-az.com-un məlumatına görə, tədbir zamanı bir araya gələn futbol dünyasının bu iki tanınmış siması birlikdə xatirə fotosu çəkdiriblər.
Xatırladaq ki, Hafiz Məmmədovun iş həyatında 2015-ci ildən etibarən ciddi eniş dövrü başlayıb. Həmin dövrdən sonra o, geniş biznes şəbəkəsini, o cümlədən “Baghlan Group” şirkətini və “Bank of Azerbaijan”ı itirməli olub. Bundan başqa, onun böyük investisiya yatırdığı Fransanın “Lans” klubu da sahibkarın nəzarətindən çıxıb.
İş adamının futbol fəaliyyətinə ən böyük zərbə isə vaxtilə iddialı klublardan olan “Bakı”nın fəaliyyətini tamamilə dayandırması olub. Borclar və maliyyə çətinlikləri səbəbindən klubun Biləcəri qəsəbəsində yerləşən nəhəng təlim-məşq bazası da məhkəmə qərarı ilə Hafiz Məmmədovun mülkiyyətindən alınmışdı.
