Azərbaycan II Liqasında 24-cü turun son oyunları bu gün keçiriləcək və turun yekunu birbaşa turnir cədvəlinə təsir edəcək. Günün mərkəzi qarşılaşması Şamaxıda baş tutacaq. Çempionluğa iddialı “Xankəndi” ilə “Qaradağ Lökbatan” üz-üzə gələcək.
Hazırda rəqibini 3 xal qabaqlayan “Xankəndi” bu oyunda qalib gəlsə, son üç tura ciddi üstünlüklə daxil olacaq. Əks halda isə çempionluq yarışı sonadək davam edəcək. Qarşılaşmanı Premyer Liqa hakimi İnqilab Məmmədov idarə edəcək.
Şəmkirdə medal uğrunda mübarizə
Turun digər görüşü Şəmkirdə keçiriləcək. Yerli komanda üçüncü pillədə qərarlaşan “Quba”nı qəbul edəcək. Qonaqlar bu oyunda xal qazansa, mövsümün başa çatmasına üç tur qalmış bürünc medalları təmin edə bilər.
Turun əvvəlki matçlarında “Dinamo” “Şirvan”ı 5:0, “Kür-Araz” “Ağstafa Gəncləri”ni 1:0 hesabı ilə məğlub edib. Həmçinin “Araz Saatlı” “Göygöl”ü 2:1, “Ağdaş” isə “Şəki Siti”ni 5:1 hesabı ilə üstələyib.
Azərbaycan II Liqası
24-cü tur
28 aprel:
16:00 – “Xankəndi” – “Qaradağ Lökbatan”
- Hakimlər: İnqilab Məmmədov, Orxan İbişov, Mirnihad Seyidov, Kamil Aydınov.
- Hakim-inspektor: Asim Xudiyev.
- AFFA nümayəndəsi: Törə Əhmədova.
- Şamaxı. Olimpiya İdman Kompleksinin stadionu
16:30 – “Şəmkir” – “Quba”
- Hakimlər: Murad Səlimov, Sevda Nuriyeva, Əhməd Əhmədsoy, Vüqar Əliyev.
- Hakim-inspektor: Babək Quliyev.
- AFFA nümayəndəsi: Azər Əsgərov.
- Şəmkir. Olimpiya İdman Kompleksinin stadionu
