Meksika millisinin dünya çempionatlarında illərdir qıra bilmədiyi məşhur “quinto partido” (“beşinci oyun”) sindromu DÇ-2026-da da sona çatmadı. Şimali Amerika təmsilçisi İngiltərəyə 2:3 hesabı ilə uduzduğu 1/8 final matçında gərgin mübarizə aparsa da, turnirlə vidalaşdı və növbəti dəfə 1/4 finala yüksəlmək arzusunu reallaşdıra bilmədi.
“Quinto partido” ifadəsi Meksika futbolunda uzun illərdir xüsusi məna daşıyır. Əvvəlki mundial formatında komandanın beşinci oyuna, yəni dörddəbir finala çıxa bilməməsi bu adla simvolizə olunurdu. Turnirin formatı dəyişsə də, azarkeşlər bu uğursuz silsiləni hələ də eyni adla xatırlayırlar.
Tarixi uğur hələ də təkrarlanmır
Meksika yığması dünya çempionatlarında ən böyük uğurunu 1970 və 1986-cı illərdə, hər iki dəfə turnirə ev sahibliyi etdiyi zaman qazanaraq 1/4 finala qədər irəliləmişdi. Həmin nəticədən sonra komanda uzun illər eyni mərhələni keçə bilməyib.
1994-cü ildən 2018-ci ilə qədər keçirilən yeddi ardıcıl mundialda Meksika qrup mərhələsini uğurla adlasa da, hər dəfə ilk pley-off görüşündə mübarizəni dayandırmışdı. DÇ-2026-da isə yığma əvvəlcə 1/16 finalda Ekvadoru 2:0 hesabı ilə məğlub edərək ümidləri artırdı. Lakin 1/8 finalda İngiltərəyə uduzması nəticəsində “quinto partido” həsrəti yenidən davam etdi və komandanın dünya çempionatlarında sonuncu dəfə 1/4 final oynadığı tarixdən artıq 40 il ötmüş oldu.
