Peşəkar Futbol Liqası Misli Premyer Liqasının 2025/26 mövsümünün yekunlarına dair ətraflı statistik hesabat hazırlayıb. Artıq ikinci ildir ki, ictimaiyyətə təqdim olunan bu hesabat mövsüm ərzində baş verən əsas hadisələri, komanda və futbolçuların göstəricilərini, həmçinin çempionatın ümumi inkişaf dinamikasını əks etdirən geniş məlumat bazasını özündə birləşdirir. Sənəd futbol ictimaiyyəti, media nümayəndələri və azarkeşlər üçün açıq şəkildə təqdim olunub.
Hesabatda hansı statistik göstəricilər yer alıb?
Hazırlanan sənəddə Misli Premyer Liqasının ümumi turnir cədvəli ilə yanaşı, ev və səfər oyunlarının nəticələri, turlar və dövrələr üzrə tamaşaçı statistikası, bombardirlər siyahısı, məhsuldar ötürmə müəllifləri, klubların heyətləri və bütün futbolçuların fərdi göstəriciləri ətraflı şəkildə təqdim olunub.
Bundan başqa, hesabatda vurulan qolların dəqiqələr üzrə bölgüsü, penaltilərlə bağlı statistika, xəbərdarlıqlar və qırmızı vərəqələr, eləcə də son mövsümlərlə müqayisəli göstəricilər də yer alıb. Bu məlumatlar Premyer Liqanın inkişaf tendensiyalarını daha aydın qiymətləndirməyə imkan verir.
Peşəkar Futbol Liqası bildirir ki, hesabatın əsas məqsədi mövsümün yekun mənzərəsini sistemli formada təqdim etmək, futbol ictimaiyyətini etibarlı statistik məlumatlarla təmin etmək və analitik yanaşmanı gücləndirməkdir. Sənədi burada PDF formatında görə bilərsiniz.
