“Qarabağ” UEFA Avropa Liqasının I təsnifat mərhələsində İslandiyanın “Vestri” klubu ilə keçirəcəyi iki oyundan əvvəl UEFA-ya təqdim etdiyi iştirak ərizəsində dəyişiklik edib. Ağdam təmsilçisi rəqiblə qarşılaşmalar üçün 24 futbolçudan ibarət heyəti rəsmən təsdiqləyib.
Yenilənmiş siyahıda diqqət çəkən məqamlardan biri bəzi oyunçuların heyətə daxil edilməməsidir. İspan yarımmüdafiəçi Coni Montiel, konqolu müdafiəçi Jeremi Qnali və yay transfer dönəmində komandaya qoşulan xorvatiyalı qapıçı Martin Zlomisliç “Vestri” ilə keçiriləcək qarşılaşmalar üçün sifariş olunmayıblar. Əvəzində baş məşqçi Qurban Qurbanov təcrübəli futbolçularla yanaşı, klub akademiyasının yetirmələrinə də şans verib.
UEFA tələbinə uyğun yerli futbolçular da heyətdə yer alıb
“Qarabağ”ın UEFA-ya təqdim etdiyi iştirak ərizəsində B kateqoriyası üzrə dörd yerli futbolçu qeydiyyata alınıb. Bunlar Teymur Həsənov, Bilal Hacıyev, Hikmət Cəbrayılzadə və Əli Bəşirovdur. UEFA qaydalarına əsasən, Avrokuboklarda çıxış edən klublar akademiya yetirmələrini iştirak ərizəsinə daxil etməlidirlər.
“Qarabağ”ın “Vestri” ilə oyunlar üçün sifariş etdiyi heyət belədir:
- Qapıçılar: Şahruddin Məhəmmədəliyev, Mateuş Koxalski, Teymur Həsənov (B), Bilal Hacıyev (B);
- Müdafiəçilər: Mateus Silva, Bençe Varkonyi, Bruno Lanqa, Bəhlul Mustafazadə, Dani Bolt, Elvin Cəfərquliyev, Bədavi Hüseynov;
- Yarımmüdafiəçilər: Jali Muaddib, Marko Yankoviç, Abdullah Zubir, Kadi, Oleksey Kaşuk, Cebrail Makreşkis, Pedro Bikalyo, Samuel Lobato, Hikmət Cəbrayılzadə (B), Əli Bəşirov (B);
- Hücumçular: Zakariya Savo, Musa Qurbanlı, Renaldo Sefas.
Qeyd edək ki, “Qarabağ” və “Vestri” arasında ilk görüş Bakıda keçiriləcək, cavab qarşılaşması isə İslandiyada baş tutacaq. Bu cütün qalibi UEFA Avropa Liqasının II təsnifat mərhələsinə yüksələcək.
