Ötən mövsüm Premyer Liqanı tərk edərək I Liqaya düşən və bu il yenidən elitaya qayıtmaq şansını əldən verən “Səbail” klubunda ciddi kadr dəyişiklikləri baş verib. Bayıl təmsilçisinin idarəetmə strukturunda çalışan bir neçə rəsmi şəxs vəzifəsindən ayrılıb.
Klubdakı dəyişikliklər komandanın son illərdə üzləşdiyi maliyyə və idman nəticələri fonunda diqqət çəkir. Məlumata görə, istefa verən şəxslər arasında icraçı direktor Firuz Abdulla, baş direktor Zamiq Hüseynov və mətbuat katibi Rəşad Məmmədov yer alır.
Maliyyə çətinlikləri qərarlara təsir edib
“Səbail”in uzun müddətdir sponsor dəstəyi olmadan fəaliyyət göstərməsi və əsasən AFFA tərəfindən ayrılan vəsait hesabına mövcudluğunu davam etdirməsi klubun gələcəyi ilə bağlı sualları artırıb. Məhz bu vəziyyətin rəhbər heyətdə dəyişikliklərə səbəb olduğu bildirilir.
Klubun baş direktoru vəzifəsində çalışan Zamiq Hüseynovun da artıq komandadakı fəaliyyətinə son qoyduğu təsdiqlənib. O, may ayında Bakıda keçirilən Ümumdünya Şəhərsalma Forumunun 13-cü sessiyasında (WUF13) fəaliyyət göstərdikdən sonra klubdakı işindən tam ayrılıb.
Premyer Liqaya dönüş baş tutmadı
“Səbail” cari mövsümdə I Liqada iddialı komandalardan biri hesab olunsa da, qarşıya qoyulan əsas məqsədə çata bilməyib. Komanda mövsümü üçüncü pillədə tamamlayaraq çempiondan 7 xal, pley-off hüququ qazanan “Mingəçevir”dən isə cəmi 1 xal geri qalıb.
Beləliklə, Bakı təmsilçisi növbəti mövsümdə də I Liqada mübarizə aparacaq. Klubun yaxın vaxtlarda yeni idarəetmə modeli və gələcək planları ilə bağlı qərarlar açıqlayacağı gözlənilir.
