UEFA Çempionlar Liqasında mübarizəni uğurla davam etdirən Azərbaycan çempionu “Sabah” bu gün növbəti mərhələ ilə bağlı mühüm xəbəri gözləyəcək. İsveçrənin Nyon şəhərində keçiriləcək pley-off mərhələsinin püşkatma mərasimində Bakı klubunun III təsnifat mərhələsini adlayacağı təqdirdə qarşılaşa biləcəyi potensial rəqib bəlli olacaq.
Püşkatma mərasimi Bakı vaxtı ilə saat 14:00-da start götürəcək. “Sabah” hazırda turnirin III təsnifat mərhələsində mübarizə aparmağa hazırlaşır və yalnız bu raundu uğurla başa vuracağı halda pley-off mərhələsində iştirak hüququ qazanacaq.
“Sabah” ardıcıl iki mərhələni uğurla keçib
Valdas Dambrauskasın rəhbərlik etdiyi kollektiv Çempionlar Liqasına inamlı start verib. Azərbaycan təmsilçisi ilk təsnifat mərhələsində Uels çempionu TNS-i hər iki oyunda məğlub edərək (2:0, 2:1) növbəti raunda yüksəlib.
Komanda ikinci təsnifat mərhələsində də uğurlu çıxışını davam etdirərək Finlandiyanın KuPS klubunu iki qarşılaşmanın yekununda 3:0 ümumi hesabı ilə mübarizədən kənarlaşdırıb. İlk oyunda minimal hesablı qələbə qazanan “Sabah” cavab matçında 2:0 hesabı ilə üstün olub.
İndi Azərbaycan çempionunu daha ciddi sınaq gözləyir. Komanda III təsnifat mərhələsində Danimarkanın “Orhus” (AGF) klubu ilə üz-üzə gələcək. Bu mərhələni də uğurla keçəcəyi halda “Sabah” UEFA Çempionlar Liqasının pley-off raunduna yüksələcək və bugünkü püşkatmada müəyyənləşəcək rəqiblə qarşılaşacaq.
Qeyd edək ki, Çempionlar Liqasının pley-off mərhələsinin ilk oyunları avqustun 18-19-da, cavab qarşılaşmaları isə avqustun 25-26-da keçiriləcək. Pley-off mərhələsinin qalibləri turnirin əsas mərhələsinə vəsiqə qazanacaqlar.
