“San Antonio Spurs”un gənc ulduzu Viktor Vembanyama NBA pley-offunda növbəti dəfə tarixi göstərici ilə diqqət mərkəzinə düşüb. Fransalı basketbolçu “Oklahoma Siti” ilə seriyanın dördüncü oyununda möhtəşəm performans sərgiləyərək komandasının vacib qələbəsində əsas rol oynayıb.
21 yaşlı mərkəz oyunçu qarşılaşmanı 33 xal, 8 ribaund, 5 assist, 2 top oğurluğu və 3 blokla tamamlayıb. Onun liderliyi sayəsində “Spurs” seriyada hesabı bərabərləşdirib.
Lebron və Durantla eyni siyahıda
Vembanyama bu statistik göstərici ilə NBA tarixində nadir nailiyyətlərdən birinə imza atıb. O, pley-off matçında ən azı üç dəqiq üçlük atışı ilə birlikdə 33+ xal, 8+ ribaund, 5+ assist, 2+ top oğurluğu və 3+ blok göstəricisinə çatan cəmi üçüncü basketbolçu olub.
Buna qədər eyni uğura yalnız Lebron Ceyms və Kevin Durant nail olmuşdu. Bu fakt Vembanyamanın artıq liqanın ən elit basketbolçuları sırasında göstərilməyə başladığını bir daha sübut edir.
Fransalı ulduz başqa bir tarixi göstəricini də təkrarlayıb. O, konfrans finalında ikinci dəfə 30-dan çox xal və minimum üç blok edən oyunçu kimi Şakil O’Nilin rekorduna şərik çıxıb.
